Lawhtam wa ai Ma Hpyenla ni The Kachin Post October 17, 2002—Jinghpaw Wunpawng myusha rawtmalan hpyen dap hkan magam gun nga ai hpyen la ni hta a'sak n hpring shi ai Ma hpyen la ni law htam wa nga ai lam hpe Shinggyim ahkaw ahkang sinyu hpung (Human Rights Watch) a munghtawn laika hta ka matsing da nga ai.
October shata 15 ya shani shabra ai dai hpung a sawk sagawn laika hta 5000 daram nga ai KIO hpyen la ni hta tsa hta shadang 40 daram gaw 18 ning lawu na Ma hpyen la ni re ngu tsun da nga ai. Dai hta Num sha Ma hpyen la ni mung lawm ai rai nga ai. Dai zawn rai ai Ma hpyen la ni gaw shabrai n lu ai sha magam gun ai sha n ga kalang marang lahta na Du ni a shinggyim lailen hte n htan shai ai hku roi katut ai hkrum sha ai rai nga ai.
“Law malawng gaw hpyen la n kam galaw ma ai raitim hpyen dap kaw na hprawng ai rai yang si ari jaw katut ai re majaw matut na magam gun nga ai re,” ngu 1992 ning hta shanglawt hpyen lahkawn katut na bai lawt wa ai Brang Mai ngu ai wa gaw sawk sagawn hpung de tsun dan wa ai rai nga ai.
Buga hta shamu shamawt nga ai kaga Jinghapw Wunpawng hpyen dap ni rai nga ai New Democratic Army-Kachinland (NDA-K) hte Sam mung dingdung hta dap jung nga ai Kachin Democratic Army (KDA) ni hta mung Ma hpyen la ni magam gun nga ai lam matsun madun da nga ai. 3,000 daram nga ai (NDA-K) hpyen dap hta 500 daram gaw Ma hpyen la ni rai n'na n'kau mi gaw a'sak 15 ning lawu na ni rai nga ai. Dai hte maren (KDA) hpyen dap hta mung Ma hpyen la gade daram nga ai hpe hkrak n chye lu ai raitim law malawng gaw Ma hpyen la ni rai nga ma ai.
Maning February shata Pajau na sai n hkaw ai daru magam kashun poi hta shara lu wa ai ni hku na shanglawt hpyen dap hpe bai garam gawgap mayu ai re majaw hpyen dap hta Ma hpyen la ni law htam wa na re ngu sawk sagawn ai ni hku na sawn shadu nga ma ai.
Mungkan ting hta Myen hpyen dap gaw Ma hpyen la law htum hte gaw gap da ai rai n'na ya ten hta Ma hpyen la 70,000 jan magam gun nga ai rai nga ai. Kaga Ma hpyen la 6,000 kaw na 7,000 daram gaw Myen mung na myusha rawtmalan hpyen dap hkan magam gun nga ai rai nga ai. Mungkan ting na Mungdan 41 hta Ma hpyen la 300,000 gaw majan pa hkan majan kasat taw nga ai rai nga ai.
