Pinheiro Myusha Ningbaw ni hte Hkrum

The Kachin Post

October 16, 2002—UN (Mungkan Wunpawng hpung) dat kasa Mr. Paulo Sergio Pinheiro gaw Myen mung na Myu sha ningbaw ni hte dai ni hta hkrum shaga wa sai lam Yangon na kam mai ai shiga hku chye lu ga ai.

Myen mung a shinggyim ahkaw ahkang lam hte seng n’na sawk sagawn na matu du sa ai UN dat kasa wa gaw ndai shata 18 ya shani hta du wa ai rai nga ai. Shi du ai hpang shani hta United Nationalities Alliance (UNA) kaw lawm ai myusha pati ningbaw ni hte hkrum bawng ban ai rai nga ai.

“Anhte mungdaw a mabyin masa ni hpe tang madun ai re,” ngu Kachin National Congress for Democracy (KNCD) ningbaw Duwa Zau Ing gaw Kachin Post de tsun dan wa ai. Ndai lang na hkrum shaga ai gaw mungdaw shagu hta byin nga ai shinggyim ahkaw ahkang hte seng ai mabyin masa ni hpe tang madun na matu hkrum shaga ai rai nga ai.

Mr Pinheiro ndai lang na sa ai lam madung gaw Sam mungdaw hta Myen hpyen la ni Sam num ni hpe roi rip ai lam hte seng na sawk sagawn na matu du sa ai rai nga ai. Sam num ni roi rip hkrum ai lam hte seng n’na lai wa sai July shata hta Sam myushayi hpung ni hku na shapraw ai ‘Licence to Rape’ (Roi Rip na ahkaw ahkang) ngu ai laika hta ka matsing da ai rai nga ai. Dai laika buk hta Sam myushayi sha 600 jan hpe myen hpyen la ni roi rip da ai lam ni hpe ka matsing da ai rai nga ai. Dai lam ni hpe Myen hpyen uphkang ai ni hkun na n re ai lam ning dang da ma ai.

Dai lam hte seng na mungkan ting gaw Myen hpyen du ni hpe mara shagun wa ma ai. Dai lam hpe hkrak sawk sagawn lu na matu Phinero gaw Sam mung daw de du sa na rai nga ai.

Ndai lang na UN Slg du sa ai shaloi Myen mung Democracy ningbaw Aung San Suu Kyi hte hkrum na sha n ga Myen hpyen du ni hte mung hkrum na rai nga ai.