Maigan Nga ni hpe Wunpawng Tsinyam Hpung Garum Hpyi

The Kachin Post

June 23, 2002—Wunpawng Tsinyam Hpung (India) gaw n'dai shata laman India de du wa ai Jinghpaw Wunpawng Ramma ni jamjau nga ai lam ni hpe matut paran ya lu na matu maigan shara shagu kaw nga ai anhte myusha ni hpang de garum hpyi dat ai lam hpe dai hpung aq shana shabra laika hku chye lu ai.

Ya hte sha hpaw hpang wa ai Wunpawng Tsin Yam hpung (India) gaw India kaw tsinyam hkrum nga ai ramma ni yawng malai maigan shara shagu na Nu, Wa, Hpunau ni hte lam amyu myu hku matut mahkai ya lu na hte shada da matut mahkai lu na matu yaw shada let hpaw dat ai hpung rai nga ai.

“N'dai gaw ya hkyak hkyak na mayak kaba rai nga ai.” ngu dai hpung aq shana shabra ai lai ka hta tsun da nga ai.

India du ramma ni yak hkak lam ni hpe WTY hpung hku na byin mai daram garum ya ai raitim ja gumhpraw hte seng na gaw bat lahkawng daram na matu sha lu garum shingtau lu sana re ngu tsun da nga ai. Dai re majaw dai hpung hku na maigan nga anhte myusha ni hpang de garum hpyi dat ai re lam chye lu ai.

Hpang jahtum lu ai shiga hku rai yang India kaw Ramma marai 202 du taw sai rai nga ai. Dai Ramma ni hpe AKSYU hte ROKA (India) ni hku na garum la nga ai riatim nga shara tam ya ai kaw na lai na laga n-lu garum ya lu ai rai nga ai.

Buga hta yak hkak jam jau ai lam majaw pru sa wa ai ramma ni gaw Myen mung de bai shang wa n-mai ai mat ai zawn India kaw Refugee shawk na lam mung aten jaw ra na rai nga ai. Myen uphkang ai ni hku na India Jarit mare hkan na Manam jarawp hkan Jinghpaw Wunpawng ramma ni hpe jep hkawm nga ai shi ga na lu ai re majaw matut na du sa na ramma ni hte buga de bai n'htang wa na ni matu mung yak ai lam chye lu ga ai.

Ndai lang na anhte myusha ramma tsa lam hku maigan mungdan de kalang ta pru sa ai lam gaw laiwa sai 2000 ning America na Guam zinlawng de du sa ai lang hta grau law ai rai nga ai. Guam hku na America de du mat wa ai ramma ni gaw marai 70 daram rai nga ai.