Myusha Rawtjat Lam Madung Dat ai Japan Ga Tsun Poi

The Kachin Post

June 10, 2002—Masum lang ngu na Japan ga tsun shingjawng poi hta Jinghpaw Wunpawng Myusha yawng rawt jat galu kaba wa na matu hte seng n'na ga shawn ga htau ni hte tsun shaga wa ma ai lam hpe JLH Japan shiga hku na lu ga ai.

Ga tsun shingjawng poi hpe dai ning June shata 9 shana hta Japan mung Tokyo mare Tokyo Peace Church hta Jinghpaw Wunpawng Laili Laika hte Htunghking Hpung (Japan) ni woi awn na awng dang ai hku galaw wa sai rai nga ai.

Ga tsun shingjawng poi gaw "Jinghpaw Wunpawng amyu sha ni rawt jat galu kaba wa na matu, buga kaw nga n'na shakut ai gaw, maigan kaw nga na shakut ai hta, grau mai kaja nga ai" ngu ai hpe madung dat na tun shaga hkat wa ai rai nga ai.

Ndai poi hpe mungkan shara shagu na Jinghpaw Wunpawng myusha ni yawng kalang ta lu yu na matu Internet hku na shapoi ya sai rai nga ai.

Dai poi hta ga shawn maga na marai masum Sabaw Hkawn San, Bamwaw Hkawng Yang hte Slg. Shang-htin Brang Wawm ni rai n'na ga htau maga na marai masum gaw Hpauyam Doi Bu, Slg. Lahpyaw Hawng Htawng hte Slg. Labang David Tu Lum ni shang lawm shingjawng wa ai rai nga ai.

Seng ang ai lit hkam Salang ni hku na poi hpe hpaw hpang wa ai hte Japan kaw du taw nga ai Jinghpaw yu- ngwi shayi Share Ja Ring hku na "Jinghpaw Buga" nga ai mahkawn hte yu-ngwi shayi Nhkum Seng Pan hku na "Kadai Lit La Na" nga ai mahkawn ni hte shakawn shagrau ya sai rai nga ai.

Ga shawn hte ga htau ni tsun shaga wa ai hta myusha galu kaba rawt jat wa na matu hte seng na mujut amyu myu hku tang shawn bawngban wa ma ai lam chye lu ga ai.

"Amyu sha ni rawt jat wa hkra shakut ga nga yang mungkan mungdang shara shagu hta nga ai Jinghpaw Wunpawng myu sha ni yawng hte seng nga ai." ngu Slg. Labang David Tu Lum tang shawn wa n'na "Amyu sha ni yawng rawt jat galu kaba wa hkra maigan kaw nga n'na shakut ai gaw grau mai kaja nga ai." ngu hpungdim dat tsun shaga wa ai.

Japan kaw nga ai Jinghpaw Wunpawng masha 300 daram gaw Thai, Malaysia mungdan hta nga ai anhte myusha ni ngut yang maigan de nga Jinghpaw ni hta law htum ai rai n'na tinang buga de ja gumhpraw law htum lu shagun ya ai ni mung rai nga ai. Laiwa sai 10 ning daram hta Japan de sa du bungli galaw na lam loi ai raitim ya ten hta gaw lu sa na matu gumhpraw grai jaw ra ai rai nga ai.