Hpun hpaga hpung ni Myen Kaichyan du na hka wa ya ra

The Kachin Post

June 4, 2002— Laja Yang mare lam hku lai ai hpun hpaga hpung ni hpe Myen Kaichyan du aq Hka hpe wa ya na matu atik anang gumhpraw bang shangun katut nga ai lam hpe ga jarit na kam mai ai shiga lawk na lu la ga ai.

Myen kaichyan du Khin Myint hpe Miwa pyada ni hku na Miwa gumhpraw Yuan 75,000 shawa ai rai nga ai. Miwa ni gaw Khin Myint hpe tara n shang hku shang wa ai majaw rim ai rai nga ai. Khin Myint gaw Miwa mung na Manam jarawp hta shawa num ni hte pyaw hkawm nga ai shaloi Miwa pyada ni sumla gayet la katut ai rai nga ai.

Dai shana nan Miwa pyada ni Khin Myint hpe ahkyuk de bang na shawa ai rai nga ai."Miwa hkran na Hotel kaba hkan Myen Kaicyan (MI) du ni shap nga ai hpe chye ai raitim hpa n lu di ga ai." ngu laiza na hpaga la lagai tsun ai.

Hpang jahpawt hta seng ang ai Myen ni hku na lit hkam let sa shaw la ai hte maren masat da ai hka hpe mung wa na matu sadi jaw sai rai nga ai. Dai hka hpe gaw Myen hpyen dap ni wa hkam ai n re sha, mungchying sha ni hte dai ginra hta hpun hpaga ga ai ni hpe lit hkam n'na wa shangun ai rai nga ai.

Ndai zawn rai ai lam ni gaw Myen hpyen dap ni hku na shanhte hta ra wa shagu mare masha ni hpe shayak sha ai lam ni rai nga ai. Dai mabyin hte seng na mare masha langai tsun ai gaw anhte hte hpa n seng ai manghkang hpe lit la na wa shangun ai gaw chyalu roi ai lam sha re ngu tsun dan wa ai.

Hpaga la ni mung ganing n chye di tim, wa ya ra ai majaw hpaga ga ai lam hte yak hkak nga ai lam chye lu ga ai. Laja Yang mare gaw Miwa ga jarit, Laiza mare kaw na deng 6 tsan ai mare re. Ndai ga jarit hku na Miwa mung de hpun shalai dut sha ai lam ni hpe mung Myen hpyen dap ni kaw kang bang ra ai rai nga ai.