Jinghpaw Wunpawng Ginra Hpaw
The Kachin Post
January 13, 2002—Kachin Centre(Jinghpaw Wunpawng Ginra) ngu ai hpe 2002 ning January shta 12 ya shani kaw na hpaw hpang wa ai hpe Wunpawng Jawngma hte Ramma Hpung ni ningshawng let hpaw hpang wa sai lam hpe dai hpung aq ningbaw Aung Wa hku na ndai shiga dap de shana wa ma ai.
Shi matut na tsun ai gaw anhte myusha ni aq matu ya aten hta grai ahkyak ai aten du taw nga sai lam, ndai aten hta nang ngai nnga mung chying sha yawng tinang aq mungdan aq matu lam amyu myu hku na bungli grai galaw ra sai lam hte ding rai bungli ni hpe galaw wa ai shaloi yawng jawm jahkrup let galaw ra nga sai lam ni hpe tsun dan wa ai.
Ngut na ndai zawn rai Ginra gaw anhte myusha yawng aq matu grai ra ahkyak nga ai zawn yawng aq hkrumzup shara langai mung re ai hte ndai zawn rai Ginra hpe masat dingsat langai hku na moi kaw na pi hpaw hpang wa ra sai lam hpe gahtap na tsu dan wa ai.
Dai ginra aq yaw shada ai lam ni hta gaw ti nang aq daidaw buga nre ai maigan mungdan shara shagu hkan du shingbyi nga ai Jinghpaw Wunpawng Amyu sha, myu tsaw, mung tsaw hte Ahkaw Ahkang lu ai myu sha byin tai mayu ai Du, Salang, Myit Su, Ramma Shayi Shadang ni yawng hpe shana dat mayu ai gaw, dai ni na aten ladaw hta Anhte Jinghpaw Wunpawng myusha hte mung chyingsha yawng a matu grai ra ahkyak nga ai Mahkin Gumdin lam lu la let Myusha yawng lam shagu hta rap rap ra ra rawt jat galu kaba wa na matu, Myusha yawng ra sharawng nga ai Mung Dan lu ai Amyu Sha byin tai wa na matu hte Myusha yawng hta hkam sha nga ai mayak mahkak ai lam ni yawnghpe yawng hkrum hkrum ra ra rai bawng ban let yawng jawm paran na matu yaw sha da let ndai Thailand mungdan Chiang Mai mare hta Kachin Centre ( Jinghpaw Wunpawng Ginra) ngu ai hpe anhte Wunpawng Jawngma hte Ramma hpung ( All Kachin Students and Youth Union-AKSYU) ni hku nna ningshawnglet hpaw hpang wa sai re lam tsun da nga ai .
Ngut nna ndai Kachin Centre gaw Maigan de na Myu sha ni aq matu sha nrai ai sha Jinghpaw mung de nga ai myusha ni yawng aq matu mung re ai lam hpe mung chye shangun mayu ai lam mu lu nga ai.
Hpang jahtum hku nna ndai Kachin Centre hpaw hpang wa ai lam hte lakap na hpaji jaw mayu ai, lam madun mayu ai, garum shingtau mayu ai hte bawng ban jahkrup mayu ai ni yawng hpe mung aja awa saw shaga dat nngai ngu na tsun da nga ai.
