Myitkyina Majoi Wunpawng Ninggawn Hkumra Manau Poi

The Kachin Post

January 4, 2002—Sen lam rai ai Jinghapaw Wunpawng myusha ni ndai Asia dan kaw htung hking hte seng ai kaba dik htum ai Poi rai nga ai Wunpawng Ninggawn Hkumra Manau Poi kaba hpe 2001 ning December shata 26 ya kaw na 2002 ning January shata 2 ya shani du hkra grai hkik hkam awng dang ai hku galaw lai wa sai shi ga na lu ai.

Dai Manau Poi kaba hta Jinghpaw mung daw kaw na wunpawng myusha ni sha nga mung kan shara shagu de na ni hte maigan myusha ni hkuma hkra sa du kamanawt lai wa sai lam chye lu ga ai. Ndai Manau poi kaba hta Jinghpaw Wunpawng myusha ni rai nga ai Jinghpaw, Lawngwaw, Lisu, Lachid, Rawang hte Zaiwa ni yawng myit hkrum man rum let shanglawm wa sai lam mu lu ai.

Manau poi kaba aq madung dat yaw shada ai lam gaw Jinghpaw mung hta nga ai ni hte maigan sumtsan de nga ai myusha ni yawng Chyurum Wunpawng sha ni tinang aq Htung Hking lailen hte Nga sat ngasa lam hpe chye na wa hkra galaw na matu yaw shada da ai re ai hpe Jinghpaw Wunpawng htung hking daju komiti ningbaw sutdu Yup Zau Hkawng hku na tsun ai hpe Myanmar Times shiga dap na shana dat nga ai.

Matut na shi tsun ai gaw ndai Manau Poi kaba byin tai wa na matu laiwa sai 2 ning daram kaw na masing jahkrat na galaw wa sai lam hte Manau Poi saw shaga laika ni hpe mung India, Miwa, Amerikan, Japan, Awstralia, Thai hte Myen mung shara shagu hkan nga ai Jinghpaw Wunpawng myusha ni yawng hpe shana shabra sai lam tsun ai.

Maigan de na manam lawmalawng gaw Miwa Gumsan mung de na re nna dai hpe yu yang Miwa hte Myen mung kata kaw nga ai anhte myusha ni lapran hta kade daram mahkin gumdin ai lam nga ai hpe madun nga ai.

Ndai Manau Poi aq matu jailang ra ai gumhpraw gaw Myen Gumhpraw lap Wan Hking 58 (Amerikan dollar Wan mi jan)daram jai lang kau ai hte Manau Poi de sa shang lawm ai masha jahpan gaw 300,000 jan re ai nga chye lu ga ai.

Acre 64 dam ai Manau wang kaw maigan hte buga kata na buhkawm ai ni hte Bumga de na sa ai myusha yawng bu hpun palawng nsam hkum hkum ra ra hte kamanawt shang lawm lai wa masai.

Htung hking hte matut manoi na kawa hte galaw shachyaw da ai lata hpa ji arai ni,daq daq ai kaw lang ai arai ni, laga htung hking hte seng ai arung arai amyu law law hpe madun da nga ai ngu na Manau Poi de sadu lawm ai maigan masha langai tsun ai.

Ngut na shana shagu yungwi panra shangoi shapyaw poi ni hte tsawm shadang tsawm shadang lata poi ni mung galaw madun lai wa ai hpe mung tsun dan nga ai.

Manau Poi nnan hpaw ai shaloi Myen hpyen du Hkin Nyunt hte shi aq malawn ni lung ai lam chye lu ga ai.