Ski Dabang Hpaw na Thai Myen hpe Garum

The Kachin Post

February 21, 2002—Jinghpaw mung Ding dung maga na Putao mare makau kaw hpaw na Ski dabang aq matu Thai Asuya gaw Myen hpe garum na re lam hpe Thai mungdan Hkring mang daju Thaksin Shinnawatra gaw February shata 18 ya shani hta tsun pru wa ai.

Myen Asuya Salang ni hte tsun shaga ngut ai hpang Thai Bu hkawm magam dap ni Myen mung kata de dai ning htum ai aten hkan mai byin ai sawk hkaja ai lam ni galaw na matu Thaksin matsun dat ai rai nga ai.

Chiang Mai kaw na Ski dabang de Nbungli hte sa yang Nari hkum mi sha na ai re majaw laga shara ni de sa ai hta grau manu singtsi na re ngu na Thaksin tsun wa ai.

Thai Asuya gaw mungdan kata hta Hken hkrat ai lam n-nga ai majaw Ski dabang gaw gap na hte seng na mahkrum madup kachyi mi sha nga ai rai ai nga ai. Ngut na dai ning gaw kashung ta ginsup poi hta shawng n’nans lang shang lawm ai rai nga ai.

Myen Asuya gaw 1990 ning ka-ang daram kaw na Ski dabang hpaw na hte Putao nbungli pa hpe madang satsaw na matu tang shawn wa sai raitim dai hpajang magam gaw arang shaw ai ni n-nga ai majaw jahkring da ai rai nga ai.

Myen mung gaw mungkan aq kahtet ai daw kaw lawm ai raitim Sinpraw Dingdung Asia dan hta tsaw dik htum ai Hkakabo Razi bum nga ai shara rai nga ai. Dai bum gaw metre 5,881 tsaw ai rai n’na Miwa mung jarit kaw nga ai rai nga ai.

Ski dabang galaw na magam gaw hpaji jaw ai ni hku na nau kam ai lam n-nga wa ma ai. "Asuya ni hku na hpaga lam hte Myen mung kata na ganing rai ai Bu hkawm magam rawt jat lam ni hpe shang chying bai ai gaw grai n-tsen na zawn re ai tang shawm ai lam rai nag ai." ngu na Bertil Linter tsun dan wa ai.Shi gaw laika ka sara rai n’na Myen mung kata hta chyam hkra hkawm chyai yu wa sai wa rai nga ai.

"Putao gaw Chiang Mai kaw na Kilo 1,000 daram tsan ai rai n’na Chiang Mai kaw na dai shara de nbungli hte sa yang nari hkum 2 na na re" ngu na mung Bertil Linter tsun wa ai. Ngut na dai shara makau na Miwa mung Szechwan kaw mung Ski dabang nga ai ngu tsu wa ai.

Ndai hpajang magam gaw Chiang Mai makau na bum n’tsa kaw Ski dabang hpaw na matu yaw da ai lam hpe Thai-Japan jawm galaw ai zuphpawng kaw na shana shabra ngut ai hpang byin pru wa ai rai nga ai.

Leisure Patine International Company gaw Japan na Hken galaw ai jak ni lang n’na dai bum n’tsa kaw kashung ta hta Ski dabang galaw na matu yaw da ai rai nga ai."Dai dabang gaw Baht wan 150 ma na rai n’na metre 20 galu na 150 kaw na 200 metre dam ai rai nga ai. Ndai magam gaw htaning htum wa maga de Ski lu jawn na matu yaw shada let galaw ai re" ngu na dai company lit hkam langai tsun wa ai.