K B C Zuphpawng Bai Galaw Na Shateng

The Kachin Post

December 5, 2002—Jinghpaw Wunpawng Hkalup Hpung (K.B.C) a 34 lang na mung shawa hpawng hpe n'dai shata htum maga de bai hpawng na matu hkyen lajang nga ai lam KBC magam gun ni hku na chye lu ga ai. Ndai zuphpawng hpe Sam mung ginwang Kut Hkai mare hta December shata 23 ya kaw na Christmas poi hte hpawn galaw wa na rai n'na 26 ya shani hta hpung dim dat na rai nga ai.

Anhte myusha ni Chyum laika lu la ai 75 ning hpring hte 34 lang na K.B.C zuphpwng hpe lai wa sai April shata praw hta Muse mare Mungmau mare hta galaw na matu shateng wa sai raitim Myen hpyen du ni ahkang n jaw ai majaw n lu galaw ai sha jahkring kau ra ai rai nga ai.

K.B.C mung shawa hpawng gaw masum ning hta kalang galaw ai rai n'na dai hpawng hta Hkalup hpung magam gun Ningbaw Ningla ni hpe lata san la ai hte buga shagu na Hkalup hpung masha ni sa du hkrum zup lu ai poi kaba rai nga ai.

N'dai lang hta K.B.C ningbaw Sara Saboi Jum a shara hte seng na gaw, “N'dai kalang gaw shi hpe shara n jaw sana re,” ngu dai zuphpawng de sa lung na hpung magam gun langai Kachin Post de tsun dan wa ai. Amu Madu shara hte seng na mung Sara Sinwa Naw a shara hta Manmaw mare kaw na Sara Labya Naw Tawng bai galai na nga ai shiga hpe na lu ga ai.

Laiwa sai 1965 hte 1975 ning hta Lashio hte Putao mare kaw galaw na K.B.C zuphpawng ni hpe mung dai aten na Myen uphkang ai ni hku na pat kau ya lai wa sai rai nga ai.

K.B.C hpung gaw Myen mung ting hta hpung ginwang 13 hte buga hpung 248 nga ai rai n'na Hkalup hpung masha 300,000 jan nga ai rai nga ai. 2002 ning gaw anhte bu ga de American Hkalup Sasana Sara Dr. Ola Hansen du shang wa ai 125 ning hpring ai shaning mung rai nga ai.