Htunghking Manau Thai kaw Dum

The Kachin Post

December 3, 2002—Shawng ningnan lang na Myit Hkrum Simsa Manau poi hpe Thai mungdan hta ndai shata praw kaw na galaw hpang wa sai rai nga ai.

Ndai Manau poi gaw htung hking sharawt ai hte hpawn Thai Hkawhkam Hpumihpol Adun Yadej asak 75 ning hpring n'htoi hpe shakawn shagrau let myusha ni lapran hta myit hkrum ai hte ngwi pyaw simsa lam hpe ra sharawng ai lam madun na matu dum ai Manau rai nga ai. Poi shingra gaw Thai-Myen ga jarit makau na Ban Mai Jinghpaw mare kaw rai nga ai.

“N myit mada ai sha ndai poi hpe sadu hpaw ya lu ai majaw grai kabu ai,” ngu Thai Hkawhkam a malai sa du na poi hpaw ya ai Thai Hkawhkam a masing magam dap ningbaw Mawm Chyau Hpyi Sadesh tsun wa ai.

Manau poi hta Thai mung ga du nga ai JW myusha ni sha n ga Myen mung shara shagu de na myusha ni mung sa du shang lawm ai rai nga ai. Dai hta Jinghpaw mung na Htunghking Committee Slg ni mung sa du ma ai rai nga ai. Poi de du sa ai masha 600 jan daram gaw myit hkrum mang rum ai hte ka manawt nga ai rai nga ai. Poi hpe Thai Hkawhkam a shangai n'thoi rai nga ai December shata 5 ya hta she hpung dim dat na rai nga ai.

“Lai wa sai ten hta n'dai zawn rai poi hpe lu galaw ai lam n nga wa ai raitim, dai ni anhte hta Manau dum na atsam ni rawng wa ai re majaw lu galaw ai re,” ngu Manau poi lit hkam Slg Dau Hkawng tsun wa ai.

“Ndai lu galaw la ai ngu ai gaw anhte nga ga ai ngu ai hpe maigan myusha ni masat dingsat jaw wa ai ga re,” mare shim lam ningbaw Slg. Gun Aung tsun wa ai. “Anhte myusha labau hpe yawng chye wa sai ga mung re.”

Ndai zawn rai Manau shadung hte Manau Poi galaw lu na matu Thai ni hku na ahkang jaw wa ai lam gaw anhte myusha ni a htunghking sharawt lu ai sha n ga manu dan ai htunghking ni hpe maigan bu hkawm manam ni sa du yu lu na matu mung rai nga ai.

“Grai htap htuk tsawm htap ai poi rai n'na anhte prat hta ndai lang sha mu yu ai,” ngu poi de sa du ai Thai Asuya Slg ni tsun wa ai.

Lai wa sai August shata kaw na Thai Asuya ni hku na Ban Mai mare hta Jinghpaw Wunpawng htunghking Manau shadung hte htunghking n'ta hpe galaw na matu ahkang jaw wa ai rai nga ai.

Manau shadung gaw gap ai shaloi Thai ni hku na jaw ai Baht 50,000 hte Thai nga anhte myusha ni a garum gumhpraw ni hte gaw shachyaw wa ai rai nga ai.