Laiza na n'ta ni jahten katut

The Kachin Post

August 22, 2002—Laiza mare hpe mare kaba hkrang shachyaw na matu Myen hpyen du a masing jahkrat da ai hte mare n'ta n'kau mi hpe run jahten kau nga ai lam hpe dai kaw na mare masha langai tsun dan wa ai.

N'ta jahten na aming hpe tau hkrau shana ai lam n nga ai sha shana yup tung hta tsi hkyen chya da ai n'ta ni hpe hpang jahpawt hta jahten kau ra ai ngu aming jahkrat na jahten kau ya ai rai nga ai. Jahten kau hkrum ai n'ta shara ni gaw Laiza mare ka-ang hta rai n'na dai shara hta gat kaba bai shachyaw na matu masing jahkrat da ma ai lam chyelu ga ai.

"Tau hkraw shana da ai lam n ga ai sha n'dai zawn rai galaw ai lam gaw mung masha ni hpe jahkrit shama ai re," ngu laiza na Slg langai Kachin Post de tsun dan wa ai.

N'ta madu ni hku na n mai byin ai lam ninghkap wa ma ai raitim August shata 16 ya shani hta KIO hpyen la ni hking hte nan sa na ya jang jahten na matu aming jaw wa ai majaw n'ta madu ni hku na tinang hkrai jahten kau ra ai re ngu n'ta madu langai tun dan wa ai.

Jahten kau hkrum ai n'ta hte gat seng ni matu gingdan ai manu n jaw ai sha n'ga dai n'ta bai shachyaw la na matu htingra mung n masat ya ai lam chye lu ga ai. Jahten kau hkrum ai n'ta gaw 10 daram rai nga ai.

Laiza mare gaw KIO uphkang ai npu kaw nga ai mare rai n'na law malawng gaw Jinhpaw Wunpawng myusha ni shanu nga ai rai nga ai. Dai mare gaw Miwa Gumsan mung hte ga jarit matut nga ai sha n'ga Myitkyina mare hte mung deng latsa jan sha tsan ai shara rai nga ai.