KIO hpyen la ni Lam galaw ai hta shangun katut

The Kachin Post

August 14, 2002—Myitkyina-Manmaw lapran na mawdaw lam galaw ai hta makau grupyin na mare masha ni sha n'ga KIO hpyen la 300 daram mung atik anan shangun katut nga ai lam chye lu ga ai.
KIO hpyenla ni hpa majaw lam galaw ai hta shanglawm taw ai hpe gaw kadai mung a'san sha n chye ai raitim mare masha ni hpe gaw August shata kaw na a'tik a'nang shagun taw nga ai rai nga ai.

Lam galaw na matu Wai Maw mare na Myen hpyen dap Hka La Ya (58) gaw Myitkyin-Manmaw lam na Shwi Nyawng Pin hte Ku Mai mare lapran na hten nga ai lam hpe galaw na matu mare masha ni hpe bat mi kalang n galaw n mai tara jahkrat da ma ai. Lam galaw ra ai mare masha law malawng gaw Shwi Nyawng Pin hte Aung Mye Tit mare na rai n'na htinggaw mi marai langai n sa n mai galaw ya ra ai rai nga ai. N lu sa ai ni gaw htinggaw mi gumhpraw 500 kaw na 1000 du hkra jaw ra ai lam chye lu ga ai.

Mare masha lawmalawng gaw lam galaw ai de tinang shat tinang gun na sa galaw ra ai sha n ga shanhte a bungli ni hpe jahkring na sa galaw ra ai rai nga ai.

Myitkyina-Manmaw lam gaw Jinhpaw mungdaw na Myen hpyen du Mawng Mawng Swe galoi mung lai nga ai lam re majaw mung ndai zawn rai aja awa galaw shangun ai re lam mare masha ni tsun dan wa ai.