KNCD datkasa rung Yanggon kaw hpaw na hkyen The Kachin Post
August 13, 2002—KNCD datkasa rung hpe Yangon mare kaw hpaw n'na Kaga myusha mungmasa Pati ni hte rau Jinghpaw Wunpawng myusha yawng a malai grau dam lada ai ladat hte mungmasa lam hta shamu shamawt lu na matu hkyen lajang nga ai lam hpe Yangon na Slg Hkung Htoo Kachin Post de tsun dan wa ai.
Myitkyina na du sa ai KNCD (Kachin State National Congress for Democracy) Slg ni hte Yangon na mungmasa myit lawm ai ramma n'kau mi gaw ndai bat praw hta UN dat kasa Razali Ismail hte mungmasa mayak manghkang paran lu na matu hkrum bawngban wa sai rai nga ai. Dai hku jahkrup ai shaloi KNCD gaw 1990 ning Pati Hkum Democracy ralata poi hta tara shang ralata hkrum da ai Myusha Pati ni hte rau shanglawm bawngban wa sai rai nga ai.
"Razali hku na nau n na ai ten hta Myusha hpung ni, NLD hte Myen hpyen uphkang hpung ni lapran hta mung masa bawng ban ai lam byin pru wa na matu Uphkang Hpyen du ni hte jahkrup ya na ngu tsun wa ai." ngu Hkun Htoo tsun dan wa ai.
Myen mung nga Myusha mungmasa Pati 8 gaw Razali du na aten hte hkrak rai n'na Myusha Wunpawng Jinghku hpung (United Nationalities Alliance-UNA) hpe hpaw n'na du na ra ai ten hta hkrum jahkrup sa wa na re ai masum brum zuphpawng (Tripartite dialogue) byin wa na matu hkyen lajang nga ai rai nga ai.
"UNA hku na myusha yawng hte seng ai masum brum zuphpawng hta shang lawm wa ai shaloi jin jin rai nga na matu ya ten kaw na myusha ni lapran hta jawm jahkrup ra ai lam ni hte seng na galoi mung bawngban nga ai re" ngu SNLD (Shan Nationalities League for Democracy) hte UNA ningbaw lit la da ai Hkun Htun U gaw Norway na DVB (Democratic Voice of Burma) shiga dap de tsun dan wa ai.
Ganing hku mi raitim KNCD Pati gaw UNA hpung kaw shang lawm n'na shamu shamawt wa sai re majaw maigan dat kasa ni hpe aten hkrak lu hkrum shaga lu na matu Yangon kaw kasa rung langai ra wa ai lam hpe "Kaga myusha Pati rung ni Yangon kaw hpaw nga tim anthe myusha ni a Pati rung n nga shi ai majaw hpaw hpang wa na matu hkyen lajang wa ai re." ngu Hkun Htoo tsun wa ai.
Lai wa sai shata htum wa mahka hta Yangon mare de sa du na UN dat kasa Razali Ismail hte hkrum bawng ban lai wa ai KNCD Slg lahkawng gaw Yangon kaw KNCD rung hpaw wa na hte seng na bawng ban jahkrup ngut ai hpang August shata 7 ya shani hta buga de bai n'htang wa sai rai nga ai.
Ndai lang na UN dat kasa hte lu hkrum ai KNCD Pati gaw JW Pati ni kaw na myusha yawng a malai shawng ningnan lu hkrum bawngban lu ai Pati rai nga ai hte shi Pati rung Yangon kaw hpaw ai mung shawng ningnan lang rai nga ai. Laiwa sai aten hta Razali Myen mung sa du ai shaloi KIO lit hkam ni hte hkrum shaga wa ai lam ni nga ai raitim hpa lam hpe madung dat na shaga hkat ai lam asan sha n chye lu ga ai.
