Malizup Zau Mai Dat Sai

The Kachin Post

August 11, 2002—Laiza mare na KIO hte ni htep ai shiga lawk kaw na tsun ai gaw 2001 ning February shata hta magam shara na shapraw n'na rim rawng da hkrum ai KIO ningbaw Du kaba Zau Mai gaw dai ning July shata hta bai dat wa sai rai nga ai.

“Mung masha ni hpe roi kau ai lam she re” ngu na Laiza mare na mying n shapraw ai magam gun Slg langai Kachin Post de tsun dan wa ai. “Ndai zawn byin wa ai lam hpe mung chying sha ni dinglun ai lam hpa n nga yang gaw mi na zawn bai byin wa na sha re,” ngu matut tsun dan wa ai.

Dai ning June shata praw hta hpang ai KIO hkrumra zuphpawng laman, ya na KIO ningbaw Du kaba Lamung Tu Jai a'hkang jaw ai hte maren July shata 19 ya shani hta Zau Mai hpe rim da ai kaw na dat ya ai rai nga ai. Du kaba Zau Mai hpe shi a mara ni hte seng na tara je yang ai lam hpa n nga ai sha dat ya ai rai nga ai. Ya ten hta Zau Mai gaw KIO ginjaw na shim ai shara mi hta hpyen ma n’kau mi sin let nga nga ai rai nga ai.

Zau Mai hpe dat ai hte seng n'na mung chying sha ni hku na n ra sharawng ma ai raitim KIO Thai mung lik hkam Du kaba Gauri Zau Seng gaw " yawng a matu kaja ai lam re" ngu tsun dan wa ai.

“KIO ginjaw Pajau tat kau ai lam hta mung Zau Mai kaw grai lit nga ai.” ngu Laiza na magam gun wa tsun wa ai. “Shi hpe mara n nga ai hku dat ai rai yang gaw kaga(shi hpe ninghkap ai ni) ni hpe shanhte(Zau Mai malawm) ni lama mi galaw wa n’hten,” ngu matut tsun wa ai.

“Zau Mai wa bai shamu shamawt lu na Ninggam ningnan langai mi re ngu na sawn lu ai,” ngu Jinghapw Jawngma ningbaw langai tsun wa ai. “Ya byin nga ai lam ni gaw anhte myusha ni matu shawng lam mat taw ai masa byin nga ai hte bung nga ai.” ngu matut tsun wa ai.

Mungmasa jen maram yu ai ni n'kau mi tsun ai gaw “ndai zawn byin wa ai lam gaw Myen hpyen du ni hku na Zau Mai hpe dat ya na matu KIO hpe shadut wa ai lam ni majaw mung re,” ngu tsun wa ai.

Maning February shata na daru magam kashun hkat ai hta Du kaba N’ban La ningbaw ai ‘Sai Ningnan hpung’ ni shara lu n'na shamu shamawt wa ai raitim ningbaw dingsa ni hpe sha shara bai jaw da ai re majaw n'dai hku byin wa ai re lam hpe Chiang Mai na Slg langai sanglang dan wa ai.

Ganing hku mi raitim Zau Mai wa rim da ai kaw na dat wa sai re majaw shawng de shi hpe ninghkap laiwa ai mung-masa la n'kau mi gaw grai sadi sahka ai hte yu sagawn nga ai lam hpe mung chye lu ga ai.

Zau Mai gaw 1993 ning hta Myen hpyen du hte gap hkat jahkring ta masat htu n'na simsa lam la wa ai lam hta mung ahkyak ai ningbaw langai rai nga ai hte maren Myen hpyen du ni hte mung grai ni htep ai wa rai nga ai.

Gap hkat jahkring ngut ai hpan Zau Mai gaw “myit dinghkup ai Hpaga la langai zawn byin wa ai,” ngu na Thai mung nga mungmasa sawk sagawn ai Slg langai maning na Zau Mai hpe shara jahkrat kau ai aten hta tsun wa ai rai nga ai. Zau Mai hte shi a malawm ni gaw lung Seng, Ja maw hte Hpun hpaga lam ni hte seng ai lam ni hta tek jum n'na shanhte kam ai hku galaw ai rai nga ai.

Dai re majaw Ka-ang pan KIO Du ni hte ram-pan hpyen du ni gaw Zau Mai wa a ladat ni hpe n ra sharawng wa ai majaw maning na February shata hta shi hpe shara na jahkrat kau ai rai nga ai.

Myitkyina mare Shatapru lawk kaw shangai ai Malizup Zau Mai gaw 1960 ning hta Yangon Dakkasu kaw na janmau lu la n'na 1957-58 lapran hta Yangon Dakkasu Jinhpaw Wunpawng jawngma hpung a Amumadu galaw lai wa sai rai nga ai. Dai aten hta KIO a ningshawng hpung rai wa ai ‘Sanit Majan’ hpung hpe mung garum gawde na lam woi wa sai wa rai nga ai.