Jinghapw Jawngma ni Myen Hpyendu hpe Ninghkap The Kachin Post
August 8, 2002—Wunpawng Jawngma hte Ramma Hpung (AKSYU) Europe lit hkam hte malawm marai 7 gaw 8888 shani hta London mare na Myen dat kasa rung de sa n'na anhte myusha ni a hkrat sum nga ai a'hkaw a'hkang ni hpe hpyi shadut wa ai rai nga ai.
“Anhte Jinghpaw Jawngma ni hku na ndai kaw na mungmasa hpung ni hte rau anhte myusha ni a a'hkaw a'hkang ni matu hpyi shawn nga ai re,” ngu shawa n'gun madun poi hta shang lawm ai jinghpaw jawngma langai tsun dan wa ai.
AKSYU malawm jawng-ma ni hku na JW myusha ni n'tsa Shinggyim a'hkaw a'hkang tawt lai katut nga ai lam ni hpe hpungdim dat ya na matu Myen hpyen up hkang ai ni hpe shadut wa sai rai nga ai. Hpyi shadut wa ai lam hta AKSYU hku na tang madun laika langai shapraw n'na London na Jawngma Shadang Lashi Gun Htawng hku n'na dai poi hta hti shana dan sai rai nga ai.
Madung tawn na hpyi shadut da ai lam ni gaw Shinggyim a'hkaw a'hkang tawt lai ai lam ni hpe jahkring ya na matu, JW myusha ni a a'hkaw a'hkang ni hpe jaw ya na matu, JW mung kata hta kam ai hku masha sat nga ai lam hte Dakkasu jawng ni hpe hpaw ya n'na gingdan ai hpaji ni hpe sharin ya na lam ni rai nga ai. Jinghpaw mung kata hta ya ten hta byin nga ai Hpaji lam, manu n jaw ai sha atik anan shangun sha ai lam, makam masham a'hkaw a'hkang shadip ai lam ni hte seng na mung yawng chye na matu hti dan wa sai rai nga ai.
“Maigan mungdan langai hta Jinghpaw Wunpawng jawang ma ni n'dai zawn rai Myen hpyen du ni hpe ninghkap ai lam gaw anthe myusha labau hta shawng ningnan lang re,” AKSYU Europe lit hkam Hkun Htoi tsun wa ai. Shang lawm ai Jinghpaw jawngma ni yawng gaw tinang a htunghking labu palawng ni bu hpun na shang lawm wa ai rai nga ai.
AKSYU Europe lakung hpe gaw AKSYU ginjaw hku na 2002 ning February shata 20 ya shani hta Europe munghpawm mungdan hta shamu shamawt na matu lit hkam shadang Hkun Htoi hpe lit jaw let hpaw hpang wa ai rai nga ai. 8888 masat n'htoi hta mungkan shara shagu na Democracy hpe ra sharawng ai Myen mung masha ni hte mung masa hpung ni gaw a'hkyak ai n'htoi langai hku masta let shaning shagu galaw ai rai nga ai.
