Thai Bu hkawm magam shatsam poi hta JW ni shang lawm

The Kachin Post

August 5, 2002—Thai mung nga Jinghpaw Wunpawng myusha htunghking sharawt hpung gaw Chiang Mai dakkasu wang kaw galaw ai Bu hkawm magam shatsam poi hta htawng ka hte shang lawm ka manawt wa sai rai nga ai.

Thai Hkawhkam magam dap hte Bu hkawm magam dap ni woi galaw ai dai poi gaw Thai mungdan de maigan bu hkawm ni law law sa du jat wa na matu yaw let galaw ai rai nga ai. Poi ndai hta Thai hkaw hkam magam npu na yu lajang nga ai Bum 36 na Thai n re ai myusha Jinghpaw, Ahka, Karen, Lahu, Lisu, Myawng hte bum nga masha hkum hkra tinang a htunghking ka ni hte shang lawm wa ma ai.

“Thai mung na Bum nga masha ni hpe mungkan ting chye wa na matu sha n ga shanhte a htunghking hte nga sat nga sa lam ni hta shada da grau chye na hkat wa na matu galaw ya ai re” ngu Ban Mai mare na Slg Dau Hkawng tsun wa ai. “Grau na Bu hkawm magam a majaw shang gumhpraw law wa na matu yaw shada na galaw ai mung re” ngu matut tsun wa ai.

Lai wa sai ten hta JW myusha ni hpe Thai ni hku na tara shang masat dingsat jaw ai lam ni hta ndai zawn rai poi kaba hkan shang lawm na matu saw shaga hkrum ai lam n nga shi ai rai nga ai.

“Thai kaw gaw JW kahtawng langai sha nga ai re majaw kaga myusha ni hta grau na JW ni hpe madung dat na shaga ai” ngu JW mare hte seng na yu lajang nga ai Hkaw Hkam magam gun Sara Sangup tsun wa ai.

“Mare masha ni myit mada ai gaw Bu Hkawm magam lu galaw dat ai n'hkan e myusha yawng a htung hking hpe lu sharawt lu na sha n ga, n mat hkra kem zing da lu na re” ngu mare salang langai tsun wa dan wa ai.

Ndai poi hpe Thai Hpaga dap hkringmang du gaw August shata 4 ya shana de hta sa du hpaw hpang ya ai rai nga ai. Poi sa masha hking mi jan daram du sa shang lawm ma ai hpe mu lu ai.