JW myusha dat kasa Razali hte hkrum na matu rawt

The Kachin Post

August 4, 2002—Jinghpaw Wunpawng Myusha Congress pati (KNCD) kaw na rapdaw salang lahkawng gaw UN dat kasa Mr. Razali Ismail hte hkrum na matu July shata hpang jahtum na bat hta Yangon mare de rawt sa wa sai lam Myitkyina na mung masa shiga lawk hku chye lu ga ai.

Myusha dat kasa ni rai nga ai Duwa Zau Ing hte Duwa Bawm Lang ni gaw August shata praw hta du sa ai Mr. Razali hte myusha yawng hte seng ai mungmasa lam ni hpe bawng ban na matu du sa ai rai nga ai. Shan lahkawng sa jahkrup na lam ni hpe Jinghpaw Wunpawng jawngma 100 jan hte mungchying sha ni kaw na ta masat htu madi shadaw ya dat ai lam hpe mying n tsun ai jinghpaw mungmasa la langai tsun wa ai.

Razali hte bawng ban na lam ni gaw Democracy hte munghpawawm mungdan masa lam ni hpe madung dat na bawng ban sa wa na rai nga ai. Yangon de du sa ai ndai kasa lahkawng gaw KIO hpung malai sa ai n re ai sha mungchying sha yawng a gawng malai hku sa du ai rai nga ai.

"KIO gaw Myen hpyen uphkang ai ni hte gap hkat jahkring da ai laman hta Myen hpyen ni tsun ai hku sha madat na mungchying sha ni akyu hpe madung dat ai mungmasa lam hpe n galaw ai sha Asuya galai wa na hpe sha lat nga ai hpe mungchying sha ni n dang sharang wa ai majaw n'dai zawn dat kasa lata na mungmasa lam hpe galaw na matu daw dan ai re" ngu dai mung masa la wa matut tsun wa ai.

Ya ten hta Razali hte lu hkrum na matu teng hkra n rai shi ai raitim, lu hkrum ai rai yang gaw mungchying sha ni yawng myit hkrum dawdan da ai lam ni hpe asan sha bawng ban wa na re ngu tsun dan wa ai.
Duwa Zau Ing hte Duwa Bawm Lang ni gaw 1990 ning Pati hkum Democracy Ralata poi hta KNCD Pati hku na tara shang ralata hkrum ai rapdaw salang ni rai nga ai. Dai ralata poi hta KNCD pati gaw jinghpaw mung ting hta rapdaw salang shara 3 lu ai pati langai rai n'na ngam ai Jinghpaw wunpawng mungmasa pati ni hta grau n'gun ja ai rai nga ai.

Dai rapdaw salang ni yawng gaw Myen hpyen dap ni rim rawng katut hkrum sai ni rai nga ai. Dai shaloi na Pati Amumadu rai wa ai Duwa Hkun Sa gaw ya ten hta Jinghpaw Mungdaw Ningpawt Ninghpang Tara Hkyen Lajang Hpung (Kachin State Constitution Drafting Committee-KCDC) ningbaw hku lit la na ningpawt ninghpang ta ra hpe Thai mungdan Chaing Mai mare kaw ka lajang nga ai rai nga ai.