34 lang na K B C Mungshawa hpawng pat hkrum

The Kachin Post

April 2, 2002—April shata 4 ya kaw na 7 ya du hkra galaw na 34 lang na Jinghpaw Wunpawng Hkalup Hpung (KBC) mung shawa hpawng hpe Myen hpyen du Mawng Aye gaw dai poi du na bat mi daram jau n'na pat kau ya ai rai nga ai. Dai re majaw KBC ningbaw lata ai lamang mung htingnut mat ai rai nga ai.

Poi galaw na ahkang hpe Khin Nyunt hte Sam Mung Dingdung hpyen du kaba ni ahkang jaw da sai raitim Myen hpyen uphkang hpung na nambat lahkawng kaba dik htum ai wa Maung Aye hku n'na poi galaw na ahkang hpe dawm kau ya ai re ngu na April shata 2 ya shani hta galaw ai KBC ginjaw amu- gun hpung zuphpawng lung ai KBC malawm langai tsung dan wa ai.

Masum ya tup galaw na dai KBC mungshawa zuphpawng gaw Sam mung, Muse mare na Mungmau shara hta galw na rai nga ai. Ndai mungshawa hpawng hta gaw KBC nignbaw lata poi hte shawa hpawng ni mung lawm na rai nga ai. Dai poi hta shawa masha 100,000 daram du sa na re ngu tak da ma ai. Dai zuphpawng hta jailang na matu yaw da ai gumhpraw gaw myen gum-hpraw lap Wan 31 chyen (US $ 38,000) daram rai nga ai.

Dai ning na zup-hpawng gaw 34 lang na KBC mungshawa hpawng sha n'ga, Jinghpaw Wunpawng myusha ni hpang de shawng n'nan hkritstan sasana du shang wa ai 125 ning hpring hte Jing-hpaw chyum laika lu la ai 75 ning hpring masat poi ni mung lawm ai rai nga ai.

"Dai re majaw ndai KBC mungshawa hpawng hpe 2003 ning December shata hkan she Sam mung Kuthkai mare kaw bai galaw na re ngu na April 2 ya shani galaw ai KBC ginjaw amu gun hpung Kasa hpawng hta daw dan ma ai re" ngu na Yangon kaw na KBC magam gun langai tsun dan wa ai.

"Ndai pat shingdang kau ya ai lam gaw KBC hte Jinghpaw Wunpawng myusha yawng aq makam masham ahkaw ahkang hpe roi rip kau ai rai ai sha n-ga, Myen hpyen dap hte KIO ni gap hkat jahkring da ai lam gaw mungchying sha ni aq matu akyu n-rawng ai" ngu na KBC ramma ningbaw langai tsun dan wa ai. "Kadun ai hku tsun ga nga yang KBC ningbaw ningla lata ai zuphpawng kaba gaw amyu sha ni law law hpe lam woi na ningbaw lata ai hte bung taw sai re. Majoi mi n'mai lata ai, masum ning hta she kalang re" ngu na Yangon KBC magam gun langai tsun dan wa ai.

Sara Saboi Jum gaw lai wa sai ten hta KBC Amumadu magam gun hpai wa sai rai n'na ya ten hta gaw KBC ningbaw langai hku magam gun nga ai rai nga ai.

Ndai hku daw dan ai lam gaw "Mawng Aye hte Hkin Nyut yan tingnyang kashun hkat ai lam rai nga ai" ngu na Myitkyina na KBC Ramma ningbaw langai tsun dan wa ai. Myen hpye dap kaichyan du Hkin Nyut hte Myen hpyen dap aq nambat lahkawng kaba htum ai Hpyen du Mawng Aye gaw shada da shingjawng hkat ai rai nga ai.

Laiwa sai 1996 ning na Jinghpaw laika 100 ning hpring masat poi kaba hta mung shan lahkawng manghkang byin laiwa sai rai nga ai. Dai poi hpe galaw na matu Hkin Nyunt ahkang jaw ai raitim poi ngut ai hpang dai poi shingra hta jung da ai Manau shadung hpe Mawng Aye hku n'na kalang ta bai baw kau shangun ai rai nga ai.

"Zuphpawng hpe n-lu galaw ai lam gaw mung masa lam re, ndai gaw ngai n-dang chye lu ai. Kaba ai ni mung yawng n-chye lu ai, hkum galaw ngu ai ga hpe anhte ni ganing di shalai lu na ta? Anhte a manu dan ai lam, akyu nga ai lam, madung dat ai lam ni hpe kadai wa chye na ya n'na makawp maga na n-nga ai majaw byin wa sai hku rai sam ai ngu sha myit la n'ngai" ngu na Yangon kaw na KBC magam gun langai tsun dan wa ai.

1965 ning na Lashio zuphpawng hte 1975 ning na Putao KBC mungshawa zup-hpawng ni hpe mung Myen Asuya ni hku na pat kau ya lai wa sai rai nga ai.

KBC ngu ai gaw Jinghpaw Wunpawng Hkalup Hpung Ginjaw rai n'na dai Ginjaw kaw Ginwang 13 nga ai rai nga ai. Ndai Ginwang 13 kata hta Buga hpung 284 daram nga ai rai nga ai. Jinghpaw Wupawng Hkalup hpung masha jahpan gaw Jinghpaw Wunpawng myusha yawng masha jahpan aq ka-ang hkup jan nga ai rai nga ai.