Policy Garam Ra Sai KIO (Letter to the Editor)
January 25, 2006

Malihkrang Walawng

Hkawp myitsu, Wunpawng Mungdan Shanglawt Kongsi amu gun ningbaw ni yawng hpang de lawu na ningbaw kaba a rawt malan mungga hta lawm ai Myen hpyen du ni galaw nga ai National Convention, NC, ningtsa Wunpawng Mungdan Shanglawt Hpung, KIO/KIA, a policy hte Myen Hpyen e kade mi roi rip satnat tim, Myen hte simsa lam asak jahkrung na ngu ai KIO/KIA uhpung a policy hpe, Jinhpaw Mung Chying mungshawa langai a ahkaw ahkang nga ai hte maren n ra sharawng ai lam hpe ja ja ninghkap dat n’ngai.

Du Kaba Lamung Tu Jai ai a 45 ning rawtmalan n’htoi masat mungga hta, “Dai Mungbawng Rap Daw hta Munghpawm Myanmar Mungdan a ningpawt ninghpang gaw da ai tara kanu (Constitution) hpe jawm myit nga ai. N’dai zuphpawng ngut kre ai hpang, matut n’na shawng lam de lahkam htawt sa wa na lam hta, anhte ra sharawng ai, anhte lu la gring, lu la ra ai Mungmasa ahkaw ahkang lam hte seng n’na byin pru wa ai mahtai, sat lawat hta hkan let, matut shakut sa wa na matu anhte jin jin rai nga ga. Maga mi de simsa lam matut asak hkrung nga hkra anhte shakut n’na, maga mi de jet ai Munghpawm Demukresi Mungdan byin pru wa hkra anhte shakut ra ga ai.”

N’dai hpe ninghkap ai gaw lai wa sai mabyin ni hta lakap n’na, Myen hpyen a, matsat shabat, yuk jahtuk lailen hpe mu nga ninglen ya na zawn 45 ning masat Rawtmalan Mungga hta KIO/KIA ningbaw ni a policy hpe chye la lu ai majaw rai nga ai.

Nanhte ningbaw ni chye chyalu rai nga ai, lai wa sai January praw 2 ya shani, sai daw sai chyen myutsaw hpyen la 5 hpe Myen gumshem ni gaw, tau nau hkyen lajang ai lam hte gapsat kau ya ai hpe myit n pyaw, yawn hkyen lawm ga ai lam shana dat ga ai. Lai wa sai ten ni hta mung ya na zawn da sang Myen e sahte tam ai hpe KIO/KIA hku n’na Myen hpe hpang de bai n byin na matu tsun lai wa sai raitim, bai kahtap byin nga sai. Myen hpyen gaw gapsat hkrum ai myutsaw hpyen la ni hte gap sat hkrum ai mungshawa a matu, shut sai lam tara shang masat masa n’galaw ya ai. Dai masa lam byin nga ai ten, KIO/KIA dap shawa a gawng malai, Ningbaw malai Du Kaba Gauri Zau Seng nan Myitkyina kaw galaw ai Myen hpyen du ni a National Convention madi shadaw poi de shang lawm let KIO a National Convention madia shadaw laika hpe Du Hkun Nawng hpe hti shagun sai hpe gaw anhte mung shawa ni na jing wa ninghkap ga ai.

Gaphkat jahkring, simsa lam la da let, KIO/KIA gaw National Convention hta shanglawm bawngban nga ai ladaw laman n’dai zawn Myen hpyen ni a matsat shabat sat nat lai len hpe yu yang, shanhte gaw kaja wa simsa lam gawgap mayu ai ni n rai nga ai. Hpyen Atsuya hpe laja lana tara shang Atsuya langai gaw de wa ai ga rai nga ai. N’dai zawn maw mawn galaw sa wa ai NC hpe mungshawa ni hku n’na mung n mai madi shadaw ga ai.

Dai lam ni a majaw, n’dai lang January 2 ya hta byin ai dudaw sai hkaw lam hpe lakap let ja ja ninghkap ai hku n’na KIO/KIA hku n’na n’dai manghkang hta lit nga ai myen hpyen du/la ni hpe aja awa ahkyak la sa wa na matu galaw ra sai. (2) Htawm hpang de n’dai zawn re mabyin ni galoi mung bai n’byin na matu Myen Hpyen Atsuya kaw n’na lit ya la na hpe KIO/KIA kaw n’na bawngban hpyi shawn na.( lama na, Hpyen Atsuya hte n’dai lam hpe bawng jahkrup tawn ai rai yang Hpyen Atsuya kaw na mahtai ni hpe mung shawa, dap shawa hpang de n’dau shabra ya ra na)

N’dai zawn Myen Hpyen ni a sat lawat ni hpe maram yu yang, simsa lam ngu ai gaw jet ai simsa lam n rai nga ai. Dai hta n ga NC kaw woi ka lajang taw nga ai Myen mung a madung tawn da ai tara ni hte ka ngut sai ka ngau ni hpe maram yu yang mung, anhte mung masha ni ra sharawng ai Democaracy hte shinggyim ahkaw ahkang, Myen n re ai amyu baw sang ni ra sharawng ai rap ra ai tara hte madu daw dan up hkang ahkaw ahkang ni hpe makawp maga ya ai tara kanu n rai nga ai hpe mu na re. Myen hpyen du ni ka da chyalu hpe lata sharawt madi shadaw lawm ai gaw bawngban lawm ai n rai, n re ai maga de sa wa ai lam hpe madi shadaw lawm ai lam she rai nga ai. Dai re majaw ya jang NC kaw na pru wa na hpe tang shawn ga ai.

Myen ginra hta du nga ai KIO/KIA Ginjaw shingnan salang ni Ginjaw de lawan ai hku du wa n’na, Ginjaw hkrum ra hpawng galaw let, ya hte na zawn Japan, US, UK, Malaysia, India hte Thai mungdan nga Wunpawng amyu sha ramma ni a manaw n’sen hpe, dap shawa, mung shawa a akyu ara, myit ra sharawng ai lam ni hpe bawng ban dawdan sa wa na. Ya na zawn re manghkang hpe tengman ai hku mung shawa, dap shawa a a-ra hte n hparan ai rai yang, KIO/KIA a ya yang na Myen hte ganawn ai policy gaw shut nga ai mu lu ga ai hte, dai policy hpe gram (amendment) lajang sa wa na matu tang madun dat ga ai.

N’dai lahta na tang shawn mat wa ai lam ni gaw, amyusha rawt malan lam awngdang na hte, mung chying mungshawa, dap shawa a a-ra hpe tang madun ai lam re. Myen a masu, myit magaw ai lam hpe Mungkan ting chye hkra mung maigan nga ai mungshawa ni hku n’na n’dau nga ma ai. Makam Masham Hpung ni hku n’na mung teng man ai hku, ningbaw ni woi awn hparan dawdan sa wa lu na matu akyu hpyi dingyang shang lawm nga ra ai.

Dai re majaw KIO/KIA Ginjaw salang ni hku n’na, Myen hpyen du ni hte mahku ai policy hpe gwi gwi gram sa wa lu na matu ya yang ahkyak ai Ginjaw Hkumra Hpawng galaw let dawdan sa wa na hpe mungshawa langai hku n’na tang shawn dat ga ai.


Lahta na Editor hpang shagun laika ka ai Malihkrang Walawng hpe (malihkrang@yahoo.com) hku matut mahkai mai ga ai.