KWAT Shiga Ningtsa

The Kachin Women's Association Thailand (KWAT) gaw Thai mungdan kaw NGO bungli hku n’na hpaw tawn n’htawm, Thai de sa du ai Kachin amyu shayi ni hte Kachin amyu sha ni hpe mai byin ai made garum shingtau lu na matu hte Kachin buga ginra de mai byin ai lam ni hta garum madi shadaw lawm lu na matu lam tam galaw shakut nga ai uhpung uhpawng re ngu chye lu ai. Kachin amyu shayi ni matsan jam jau hkrum n’na, maigan de masu dut sha hkrum ai lam ni hpe maigan de, mungkan de na chye lu na matu hte dai zawn re ai manghkang ni hta maigan kaw n’na hpaji jaw garum jaw lu na matu shakut garum ai hpe gaw chyeju dum ga ai.

Raitim, Myen hpyen atsuya hpe mungdan ting gasat shazim lam galaw na matu hpyi shawn ai lam, atsuya hpyen dap ni hpe bum nga amyu sha ni a ginra kaw n’na dawm mat wa na matu hpyi shawn ai lam, mung masa ninghkap hpung ni hte bum nga amyu sha ni hte rau, uhpung maga 3 shada bawngban hparan na matu shadut hpyi shawn ai lam, Miwa mungdan kaba hte mungsang maigan uhpung ni kaw n’na, Myen hpyen atsuya hpe mung masa gram galai lam galaw na matu shadut ya na hpe hpyi shawn ai ngu ai lam ni gaw mung masa shamu shamawt bungli ni rai nga ai majaw, NGO uhpung langai mi hku n’na hpaw shabawn tawn ai KWAT a NGO bungli hte seng n’na shamu shamawt yak wa chye na re.

KWAT gaw dai zawn mung masa bungli de kabye lahkam shang bang wa ai rai yang, Thai mung kata kaw mung NGO bungli hku shamu shamawt bungli galaw yak wa chye na re ai hta n ga, Kachin buga ginra de matut mahkai ai lam, Kachin buga de na Kachin Women Association, KWA, Ginjaw hte matut mahkai ta gindun bungli jawm galaw ai lam ni hta mung ahtu hkra mat wa na rai nga ai majaw, KWAT gaw tinang a lam hpe atsawm sha myit sumru yu n’na galaw yang kaja na re ngu Sheli Seng lit hkam shabra ai The Kachin Post shiga “Kachin Women Urged Withdrawal of Burma Army from Ethnic States” a ningtsa e hpaji jaw dat n’ngai. (May 23, 2005)

Dr. La Ja
Lai Za, Alen Bum