Mai Kaja ai Shiga Hkrai Ka Ga

The Kachin Post Editor hpang de laika hte hkrum dat ai. Ya hte news analysis kaw lawm ai Myitkyina na myitsu Sumbrun Yaw a ningmu hpe The Kachin Post zawn re ai mungkan shara shagu nga bra nga ai anhte myusha ni lu hti ai shiga pinra hta bang ya ai majaw mau ga ai lam shana dat ai.

Shiga editor ni a lit gaw, jaw ai shiga, mung chying mung shawa hpe akyu jaw mai ai shiga, mungdan Atsuya hpe akyu jaw mai ai shiga ni hpe atsawm sha verify galaw n’na she bang mai ai re lam journalist ni a ethical code of conducts kaw lawm ai hpe anhte chye na ga ai. Masha shada, mung shawa shada, makam masham hpung shada, uhpung uhpawng shada da hte mungdan shada majan byin, gasat gala wa mai ai shiga ni hpe koi gam ra ai lam ni mung lawm nga ai.

Ya hte Sumbrun Yaw ka ai shiga analysis hta Lazing Bawk bawm kabaw hkrat sum mat ai lam ni, Sut Du Bawmwang La Raw Wunpawng Mungdan Shanglawt Hpung, KIO, hpe ga gumran mat wa hkra gumhpraw lu n’na “ana” galaw ai wa re nga ai ni gaw kachyi mung n jaw nga ai. Pan Kachin Development Society, PKDS, mung shi e hkrai hpaw da ai n re. Anhte mungdan kata na Sut Du ni hte Salang n’kau mi jawm hpaw da ai she rai. Long term hta kata na Sut Du, myitsu du salang ni mahtang lit la garum ai lam n nga n’na shi kaw yawng “Bawmwang La Raw a PKDS” zawn byin wa ai she rai. N'dai lam ni Sut Du Yup Zau Hkawng ni, Du Kaba Gauri Zau Seng hte PKDS gawgap sa wa ai shawng na zuphpawng hta shang lawm ai salang ni hpe san yu yang mahtai madung chye na re.

Sut Du Bawmwang La Raw gaw Ningbaw Kaba Maran Brang Seng a prat kaw n’na Wunpawng Mungdan Shanglawt Hpung hte Hpyen Dap, KIO/KIA, rawt jat wa hkra mungshang hkrun lam ni hta magam gun hpai mat wa ai lam ni, KIA hpyen dap galu kaba wa hkra nga n’na sanat laknak ni hpe mari mahkawng ya mat wa ai lam ni gaw, shi lu dum n’na n rai, ya na zawn KIO hka bra u ga ngu n’na n re lam ni hpe n chye ai rai yang, Shanglawt Ginjaw salang ni hpe san la mai nga ai.

KIO/KIA ga garan, hkrat sum na gaw anhte amyu sha ni kadai mung n ra ai hkrai re. Ya hte na zawn yawng hkrum ra hkra shakut bawngban nga ai ten hta salang Sumbrun Yaw a ningmu ni hpe The Kachin Post kaw n’na shabra ya ai gaw shada myit hkrum lam de n rai, negative maga de law ai hpe mu ai majaw hpang de The Kachin Post grau rawt jat wa let, mung chying mung shawa, uhpung uhpawng a matu akyu rawng ai shiga dap rai nga lu na hpe myit yaw shada let n dai laika hpe ka shagun dat ga ai.
(September 21, 2004)

Kachin EU