Wam Mat wa ai Shadang Sha

Ya na zawn Wupawng Mungdan Shanglawt Hpung KIO/KIA a kata kaw byin nga ai manghkang htap htuk ai hku shangut wa lu ai gaw myit hkrum lam hta n’gun ningnan rai wa ai hpe ra marin nga ai Wunpawng amyusha hkum ding dek a matu gaw myi prwi pru hkra kabu na aten rai sai. Hpa majaw nga yang, laiwa sai bat hta hka bra mat ai KIO/KIA magam gun ni bai hkrum zup lam lu n’na, amyusha hte mung dan a matu grau mai kaja ai shawng lam de shanang mat wa na hpe myit hkrum ta masat ka shagrin lu sai rai nga ai. N’dai gaw grai na kabu hpa grai n’gun awai lu hpa chyoi pra ai n’htoi rai sai.

Chyum laika mau mwi na dam mat wa ai shadang sha gaw kaja wa nga yang dam mat wa ai n rai, myit shadang n’na shi myit ai hku n’ta kaw na wam hkawm mat wa ai she re ngu tsun mai nga ai. Raitim n’ta e nga ai Kawa a matu hte n’ta masha ni hku n’na yu ga nga yang shi gaw dam mat wa ai rai nga ai. Shadang sha a matu mung n’ta kaw na pru mat wa ai ten hta gaw shi a matu yak hkak ai lam hkrum hkra ai lam n nga ai majaw dam mat wa ai n’rai, wam mat wa ai she re ai. Kade kaning re ai mi raitim hpang jahrum n’ta de bai wa ai ten hta gaw shi a matu mung n’ta nga Kawa dingla a matu mung myiprwi pru hkra kabu lu ai aten rai taw nga ai.

Raitim, htingbren pru lai wa sai Du kaba Lasang Awng Wa ni mung, dai chyum lai ka na dam mat wa ai shadang sha hte nan gaw hkrak tup n bung ai. Shanhte gaw byin mayu ai, amyu a matu ngu ai myit masa hte gan koi yen ai laman magam gun kaw na shapru kau hkrum ai ni she re. Shanhte dai ni myit malai n’na bai wa ai hku mung n re. Raitim myusha yawng a akyu ara mai kaja ai grau ai galu kaba ai myit hte bai tinang a KIO/KIA Ginjaw madung de bai n’htang wa ai she rai na re ngu kam ai. KIO/KIA Salang ni mung Hpu shawng Hpuba myit madun ai rai sai ngu masat masa galaw mai nga ai. Wupawng Amyusha Mungbawng Rapdaw, WMR, a shakut ai lam mung kasi kanan la hpa, shakawn shagrau hpa rai sai ngu masat masa galaw mai ai.

N’dai zawn re ai bai kahkyin gumdin wa ai aten hta, n’ta kaw na dam mat wa ai shadang sha hpe Kawa dingla gaw kabu gara myi prwi si hte kasha hpe hkap tau la ai rai tim, n’ta kaw kang ka ai hte nga ai kasha gaw grai myit sindawng ai lam byin ai lam nga ai ngu ai hpe mung dum da ra na re. Dai majaw n’dai zawn n’gun lu hpa, kabu hpa masa hta makau grup yin kaw na manawn masham ni mung nga chye nga ai. (November 16, 2004)

Alen Tsadoi