Ngai Zawn Nawn ai Mung Masa

Shinggyim masha gaw hkawm nga ai shaloi na hta Sa Ra kaw hkring sa nga ai kaw na bai rawt na grau yak nga ai. Kalang mi na Jahtung Bum Gasat Poi sum n’na, lagu hkring sa la nga ai Hpyen la ni shada jahta hkat nga ma ai. Hpyen la ningnan tsun ai, ngai gaw Majan sa yang Amyawk kaba htim bun ai hpe grau hkrit ai. Hpyen la Usa gaw, Amyawk n hkrit ra ai, gapaw hkang kaw htim gawp gawp rai yang, n hkra lu ai. Hkrit ra ai gaw Kyi Shang Sinat abre wa yang she yen yak nga ai.

N’dai lam hpe Dap Ba 24 Up Miwa Hpyen Du Lin Pyau sa na kau sai. Kyi Shang Pala mung n’sen hpe madat let, mai yen ai lam sa jahta lawm ai. Grau yak ai majan hta anhte shang na matu hpaji jaw ai. Usa ni Kyi Shang hkrit, ningnan ni Amyawk hkrit re majan ningmu n bung ai Hpyen Hpung kaji gaw galoi du hkra naw gasat ra na ta? ngu n’na, Tingnyang-Up hpang de laika ka ai. Shaloi “Kaji la ai Wan mun yang gaw, Mungdan ting hkru wa lu ai” nga mahtai jaw sai.

Hpyen n’gun 9,600 rawng ai Dap Ba 24 Dap Up wa gaw shi a shagan Hpung hte shani shagu na Majan Poi dang ai grau law tim, Pan Dung n mu ai sha, gasat poi shang nga ai. Hpang daw na Pan Dung gaw Ginjaw Salang ni myit n kaji na matu rai nga ai. Shi shara shi ngang ngang tsap ai wa re. Shi a Dat kasa gaw shagun laika rai nga ai.

Dai ni na anhte a la-pai, la-hkra shanang ai mung masa uhpung shagu “K” hpe n’hti n’htang lang let woi shalawt na ngu ai hpe mung shawa ni grau chye na ya nga ma ai. La-pai de na wa mung la-hkra de na wa mung nau n shanang ai rai yang, Chyahkan lagaw hkawm sharin ai hku n mu mada ai sha, ya kaba rawt wa nga ai ramma ni lahpa atsawm sha lu galai la na re. Dai majaw, ngai zawn nawn ai Mung masa gaw ya na zawn uhpung garan n’na bai myit hkrum kahkyin gumdin ai shaloi pru wa ai mahtai gaw Pan Dung re ngu sawn la lu ai.
(July 28, 2004)

Jarit Pung Hkaw