Mahkri Katsing Sha Hkrup ai Hpa

“Ginjaw Lung Ramma Ningbaw ni hpe Ahkyak La na Hkyen” nga ai shiga hpe lu hti ai majaw chyeju dum ai. Raitim banau ni jahkrit n’na yawng shagri brep mat ai pyi ram la sai ngu yang, ya she makru bai rawt wa ai ramma ni hpe jep na nga na yang mahkri katsing sha hkrup ai hpa ahkri she nga mat sai.

Wanglu Wanglang Tsun Shaga Ahkaw Ahkang (Freedom of Expression) ngu ai ga hpe Ginjaw na Du Kaba ni gara hku chye na ai kun The Kachin Post kaw na naw san ya rit. Jahkrit shama jep, masha sat re ai prat hpe tsaban 20 ning hta yawng tawn da let dam lada ai ningmu ni hte lawan jahkrup n’na n-gun gahkyin let shawng lam de lawan rawt htim ra sai ngu, ngai langai hku n’na chye na ai.

Ginjaw hta byin ai masa mahkra gaw Generation Gap a majaw re. Manghkang hpe jahkrit shama n’na sha gaw n lu tsi sana re. Ningmu she lawan jahkrup saga. Byin lai wa sai lam ni hpe mara raw malap kau (forgive and forget) n’na labau a hkring htawng, myusha lamyan hpe lawan gawgap ra sai ngu myit lu ai. (January 27, 2004)

Hkasha Naw Awng