Laiza Kaw Byin Nga ai Shiga

Wunpawng Mungdan Shanglawt Hpung Ginjaw de Zuphpawng sa lung n’na bai du wa ai Laiza mare na Mung salang ni hpe pru hkawm ai lam n galaw lu na ngu n’na KIO kaw na pat hkum da ai lam na chye lu ai.

Laiza mare nga Sara Kaba Doi La a nta hpe mung KIA hpyenla ni kalangmi bai sa wang jahkrit ai lam, Sara Kaba Doi La a nta masha ni, shi a kasha ni hpe mung Ningwa hpe sat kau ya sai ngu n’na jahkrit ai lam ni hpe na chye lu ai. Sara Doila gaw Laiza mare kaw jawng hpaw n’na ma ni hpe laika sharin ya nga ai Sara langai rai nga ai. Ya ten hta shi hpe Du Kaba Lasang Aung Wa ni hte matut manoi nga ai ngu n’na Ginjaw hta san jep nga ai rai nga ai.

Ndai zawn galaw ai lam hpe anhte sung sung myit yu ai shaloi, Jinghpaw Wunpawng mungshawa hpe makawp maga na malai grau kaja wa hkra galaw ai masha ni hpe jahten sharun, dumbru dumbra byin shangun ai lam de she rai wa na re ngu sawn maram lu ai. Dai zawn re ai lamyan gaw, Myen wa a myit masa hte raw nan byin taw nga sai lam sha re. Hpang de raijang, dai zawn re ai KIA ni gaw Myen hpyen wa hta n’na pi grau hkrit ra ai madang de du wa na sha rai nga ai.

Mung shawa hpe tsawra makawp maga n’na pyaw tim, yawn hkyen raitim rau sha Mungdan a lam hpe hparan galaw sa wa na malai, tinang hpe jaw ai hku hpaji jaw, shading sharai ai mung salang ni hpe Ahkaw Ahkang gare gashun mayu ai, chyoi dum ai hku sawn la nna Mung shawa gaw da ai hpyendap re ai hpe n dum ai sha jahkrit shama, sharim ai lam gaw Jinghpaw Wunpawng myusha yawng a matu kaja ai lai masa gaw rai na n shadu ai.

Dai KIO Ginjaw de du lung wa ai mung masa salang, mung shawa hte ramma ningbaw ni gaw Jinghpaw Mungdaw shara shagu na lata san dat ai Datkasa ni rai ma ai hte maren, shara shagu na mungchying sha hte ramma yawng a gawng malai tai let sa du ai ni rai ma ai lam, shanhte a hpang kaw Jinghpaw Wunpawng Mungshawa law malawng tsap nang ai lam chye lu ai. Ginjaw de mung shawa yawng ganawng lung n manu ai majaw, gawng malai hku lung ai lam sha re lam, shanhte a hpang hkan masha ni gaw Jinghpaw Wunpawng myusha yawng hpe kaja wa nan tsawra ai ni rai ma ai lam, KIO/KIA gaw mung shawa gaw da ai uhpung re nga hkap la kamsham ai majaw, tinang a kashu kasha, jinghku jingyu ni Myen de shang bang wa na hpe grai tsang ai ni she rai ma ai lam chye lu ai.

Dai re ai majaw tsawra hkungga ai mung salang, ramma manaw manang ni yawng hpe shatsam dat mayu ga ai lam gaw, hpang jahtum jaw ai wa hte shut ai wa hpe ginghka lu na rai n’na myit tsang n ra ai. N’gun awai la na lam kaba re hpe numhtet dat mayu ai. (January 20, 2003) Ninggawn Shawang

Lahta na Laika na ningmu ni gaw shalat ai wa Ninggawn Shawang a ningmu ni sha rai n’na, The Kachin Post a ningmu ni n re ai lam chye shangun mayu ga ai.