Jinghpaw Laika Hku Hpaji Jaw Hkat Ga

Laiwa sai December shata 4 ya n’htoi hte The Kachin Post website hta English laika hku ka shabra da ai ‘Open Letter to KIO Leaders,’ by Namhtum Pahtau/ An Ordinary Kachin Citizen ngu ai ningmu ga ngau hpe mu hti ai majaw kashalat ai wa Namhtum Pahtau gaw Kachin citizen langai re ai ngu sawn lu ai. Raitim, KIO ningbaw ni kaw, English, American, shan hpraw maigan amyu masha n lawm ga ai. Hpa majaw KIO ningbaw ni a matu English laika hte ka ai rai kun?

KIO ningbaw ni hpe hpaji jaw mayu ai, dinglun mayu ai rai yang tinang amyusha ni ka lang akyu jashawn nga ai Jinghpaw laika hte ka shagun jaw mai ai. Anhte myusha ni laika lu n’na akyu jashawn ka lang nga ai mung shaning 100 ning jan nga saga ai. Anhte myusha ni shada she ka shana hkat mayu ai rai yang English laika hte gaw n ka hkat ra na re ngu myit lu ai. Dai majaw, hpa baw lachyum hte mahtang KIO ningbaw ni hpe English laika hte ka shabra jaw ai rai kun?

N’dai Namhtum Pahtau a ‘Open Letter to KIO Leaders’ hpe English laika chye hti ai ni yawng gaw, mu hti n’na anhte myusha ni hpe maigan myusha ni hku na shakawn shagrau na lam nga na n re. Namhtum Pahtau ngu n’na shamying la ai wa a matu mung, tinang a hpyi tinang gawng kau ai, tinang a labu palawng tinang raw kabai kau n’na, hkum shakrin madun hkawm ai kaya kahpa lam sha she rai na re.

KIO ningbaw ningla ni hte KIO uhpung gaw, maigan amyu masha n lawm ai n’na tinang a buga hta shanu nga ai ni rai nga ai. Anhte myusha ni laika lu ai amyu ni rai nga ga ai hte maren, tinang a Jinghpaw laika hte shada hpaji jaw, shadum sharai ding lun ai hpe grai chyeju dum ga ai ngu n’na tusn mayu ga ai.

Prat madang dep, laika hpaji kaba chyoi chye ai hte mungkan mungdan law law de chyam bra nga pra shajang n’na myu tsaw myit masin hpring ai Jinghpaw Wunpawng hpu nau ni a majaw, anhte myusha ni hte KIO uhpung uhpawng gaw n’gun lu arawng lu shajang nga ga ai law. (December 16, 2003)

Ninggawn Daju/Pajau Bum