Zau Mai a Matu

Laiwa sai July shata KIO hkrumra zup hpawng hta dawdan ai hte maren Malizup Zau Mai hpe rimda ai kaw na dat ya ai hpe na lu ai majaw Jinghpaw Wunpawng myusha langai hku na nye a ningmu n'kau hpe yawng chye lu na matu Kachin Post hpang de laika shagun dat ai re. Moi Yangon dakkasu Jinghpaw Wunpawng ramma hpung Amu madu lit la nga ai ten na Zau Mai hte ya ten na Zau Mai grai ninghtan shai mat ai hpe ngai gara hku myit yu n lu ai gaw teng sha re.

Ya gaw anhte myusha lawmalawng a ningmu hta gaw Zau Mai ngu ai gaw mysha hkrat sum ai lam tam ai wa, n kaja ai wa ngu mu nga ma ai. Dai gaw kaja wa re ai kun? Moi anhte Yangon dakkasu hta rawtmalan hpang na matu jahta hkat, bawng ban hkat ai aten ni hpe bai sumru yu ai shaloi ya na zawn byin wa na hpe gara hku mung n shadu ai. Shi kaja wa shut kau ai lam ni grai nga wa na re. Raitim shi rawtmalan hpe shi prat langai hku, dakkasu langai hku hkam la na galaw gun hpai wa na re ai hpe gaw ngai kam ai.

KIO ginjaw Pajau hkart ai kaw na gap hkat jahkring ai kaw du hkra shi a majaw re ai, shi mare re ngu na tsun nga ai. 2001 ning hta shi hpe shara jahkrat n'na rim da ai mung dai mara ni majaw re ngu ai wa hpa majaw ya gaw hpa tara jeyang ai lam n nga ai sha dat dat ai rai? KIO hkrat sum wa ai gaw shi mara hkrai rai yang gaw Zau Mai lahkawng lang si ging ai. Kaga KIO magam gun ni kaw mung mara n nga sai kun? Hpa mi rai rai Zau Mai gaw kaja wa si gwi, gasat gwi, dangla gwi ai rawtmalan la langai re ngu ai hpe ngai kam ai. (September 01, 2002)

Zau Mai a manang langai.