Lasang Awng Wa hte Interview

July 1, 2004

The Kachin Post; Du Kaba Lasang Awng Wa Pang Wa mare de hpa majaw sa du nga ai rai?
Lasang Awng Wa; NDA-K ningbaw Zahkung Ting Ying gaw e ya nanhte mung tsaw myu tsaw myit rawng ai ni wa ya dan rai na ayai hkawm gaw, n re maga de du mat wa yang grau anhte amyu ting a maut akyu n rawng mat wa na re. Nan hte nang nye shara de wa nga mu nga n’na, wa nga ai hku rai nga. Anhte dai kaw lu ai sha ai bu ai hpun ai, tsi mawan garum shingtau ai hku nga. Anhte hpe shara masta ya ai. Pang Wa hte gade n tsan ai kaw anhte hpe hpyen dap shara hku na jaw ai.

The Kachin Post; Dai kaw Du Kaba na malawm ni marai gade daram rai sai kun?
Lasang Awng Wa; Ya anhte gaw, ya ngai shingan de bungli shangun dat ai hte ya nang n’dai kaw e ta tut nga taw nga ai ramma ni rai yang 800 grupyin rai sai. Mare buga de na mare salang ni, ramma ni mung hpung hte hpung shang wa rai yang anhte nang kaw dap hku na nan gumhkin nga ra mat ai le.

The Kachin Post; Du Kaba hpa baw galaw na masing nga ai rai?
Lasang Awng Wa; Anhte gaw…Dawng Hkawn kaga jun ai lam mung n nga ai. KIO Dawng Hkawn sha re. Tara mung KIO a tara sha re. Hpyen dap gaw da ai lam mung anhte Shanglawt hpyen dap a gaw da ai lam sha re. Mying mung kaga mying shamying ai lam mung n nga ai. KIO, KIA hku na sha shamying ai. Council hpe mung shawa salang ni law law shang lawm ai hpaji jaw Council langai san da ai.

The Kachin Post; Dai Hpaji Jaw Council gaw hpaw sai i?
Lasang Awng Wa; Ya hpaw tawn da sai. Lahta Tsang Mung Shawa Council (Superior Public Council) ngu shamying ai. Dai gaw anhte a baw tai ya ai le.

The Kachin Post; Dai kaw kadai ni lawm ai rai?
Lasang Awng Wa; Lawm ai gaw hpyen pru ni, sara kaba ni hte magam gun ni re. Mying gaw garai n tsun na. Ya yang nang anhte hpyen du ni mada rai yang gaw Council salang 3 daram re.

The Kachin Post; Dan rai yang KIO lahkawng rai wa ai ga i?
Lasang Awng Wa; Ya gaw lahkawng rai nga, raitim langai sha byin wa na re. Anhte a yaw shada ai pandung gaw, mi na KIO gaw shaning 40 ning jan raitim, rawt jat galu kaba wa ra ai baw re ai wa hpang de rai wa. Rai yang gaw, dai daram du daw sai hkaw wa ai share shagan ni mung shawa ni, ning re ai ni hpe n mu mada mat, sai hte arang shatai na gaw gap tawn da ai mung shawa a KIO, KIA wa dai ni mung shawa KIO, KIA n byin n’na, masha langai lahkawng a dingkyeng akyu ara sha rai mat wa.

Dai ni anhte buga na Hpun, Kawa, Dusat Dumyen, Ja, Lung Seng ma mat wa raitim anhte mung shawa ni gaw hkyep din n din ai ni mung hkyep din n din ai nan nan, n’ta jashep kaw rawng ai ni mung n’ta jashep jaw nan nan. Hpun dai kachyi sha law kaw na dai ni kaba hkra yu gawn hkang ai mung shawa ni gaw akyu hkam sha lam kachyi mung n nga. Tinang dum n’ta gap la na ngu na Hpung law langai lahkawng sa kran ai mung Miwa ni madaw she lamu ga madu zawn rai pawt wa rai. Salang langai lahkawng a majaw maigan ni hpe shayaw kau n’na, anhte mung shawa gaw lani hte lani yan le mat wa.

Re majaw anhte mung dan anhte n lu madu ai Colony lahkawn masum a mayam zawn rai wa zawn zawn rai mat wa. Dai zawn re majaw anhte gaw mung shawa dap shawa ra sharawng ai, mung shawa hpe akyu ara jaw lu ai, mung shawa gawng malai tai ai, anhte Wunpawng myusha ni shawng lam hte Mungkan a man dan dawng wa lu ai, greng grak amyu langai byin hkra woi awn sa wa ai KIO, KIA byin hkra galaw na ngu na anhte Pandung Shadaw dai re.

The Kachin Post; Mung shawa ni gaw kade daram madi shadaw ma ai rai?
Lasang Awng Wa; Ya anhte hta da ai jahpan hpe yu yang pum 3 kaw na pum 2 daram gaw anhte hpe madi shadaw ngu na mu mada ai. Ya htaw de [KIO] kaw magam naw gun taw nga dap shawa pum 3 kaw na pum 2 daram gaw anhte galaw ai hpe e teng man ai lam ngu mu ma ai.

Woi Awn ai n jaw ai gara wa hpe mung anhte n ra ai. Dai ni hpe anhte mung dan a ahkaw ahkang mung n ap mayu ai. N’dai zawn rai hkring htawng hpe mung anhte n tawn da mayu ai. Dai majaw myusha lam n myit ai sha, myusha shingma kaw mam ting sha ai gara salang hpe ma anhte n ra ai.

N’ban La hte ngai mung an-hpu she re ai gaw, an ga law hkat ai lam mung n nga, shi hte an mung rau lu rau sha na nga ai. Raitim masa n hkrum mat wa ai. Masa n hkrum ai ngu ai gaw shi gaw mung shawa ni hpe n myit ya, shi tinggyeng akyu awng dang yang rai sai ngu galaw sa wa. Ngai gaw nye akyu hpe yawn kabai kau da n’na, mung shawa akyu matu galaw ai re majaw, mung shawa akyu n rawng ai hpe gaw galoi ma ngai n hkap la ai. Nye asak sum hkra ngai ninghkap na.

The Kachin Post; Lama wa Myen Hpyen Atsuya hku n’na KIO hpung lahkawng yen hpe hkap la wa yang gaw gara hku rai wa na rai?
Lasang Awng Wa; Lahkawng hkap la hkra rai ai ladat mung anhte n galaw na re. Myen ni hte tim anhte gaw simsa lam la da ai KIO sha re majaw, anhte gaw Dawng Hkawn langai bai jan mat wa na hpe mung anhte n ra ai. Ya Dawng Hkawn kaga ga rai ai ni hpe pi anhte amyu ni langai sha byin ga ngu n’na anhte gahkyin ai re. Langai sha byin wa hkra ma galaw na re. Byin mung byin wa na re ngu mung kam ai le.

The Kachin Post; Du Kaba ni n’dai hku shamu shamawt ai lam hte seng n’na Ja Gumhpraw (Fund) gaw gara kaw na lu ai rai?
Lasang Awng Wa; Ja Gumhpraw daw gaw ya gaw anhte hpa mung n ra ai le. Lu na sha na, tsi mawan sha ra ai gaw, ya nang jinghku ni hku na myutsaw myit hte garum ai. NDA-K ni hku na gawn lajang tawn da ai.

The Kachin Post; Duwa Bawmwang La Raw kaw na garum ai lam ni nga ai i?
Lasang Awng Wa; Duwa Bawmwang La Raw gaw mung shawa gawng malai hku na galoi mung teng man ai maga tsap ai re majaw anhte hte mu mada hkrum ai salang langai mi re. Shi hku na garum n’na hpaw tawn da ai ngu n nga ai. Anhte dan rai Lauban tam mung n tam ai.

The Kachin Post; N’dai masing gaw kade daram madang du hkra awng dang na ngu shadu ai rai?
Lasang Awng Wa; Dai gaw aten grai wa gaw n galu na re ngu shadu ai. Dai ning laman hta byin ra gaw e. Mung shawa shabyin da KIO she re. Mung shawa she daw dan na re. Gara hku raitim ladat langai ngai hte anhte langai sha KIO, KIA hku na sha nga mat wa na re. Mung shawa mahtang lapran kaw e tara agyi bai tai n’na, shanhte gaw gap da ai gaw shanhte bai garam na ngu kam ai.

The Kachin Post; N’dai zawn shamu shamawt wa ai masa lam ni hta n myit mada ai sha shada da gap hkat wa na masa ni byi wa chye ai i?
Lasang Awng Wa; Shada gap hkat na amying jahkrat ai wa gaw ginjaw salang raitim dai wa gaw mara kaba lu na re. Ngai she shawng gap hpang ai rai yang, ngai gaw Wunpawng amyu yawng a lapran e mara kaba dik ai wa rai sai. Dai majaw dai daram madang gaw n byin na re. Ya [KIA] Dap Ba hkan nga nga ni mung chye na hkap la ai ni, anhte mabyin masa hpe kraw kata kaw na chye na ai ni law ai le. Dai majaw gap hkat hkra gaw n galaw na re ngu anhte kam ai.

The Kachin Post; Du Kaba na hpung hpe tara shang n’dau ai lam nga sai kun?
Lasang Awng Wa; Tara shang n’dau yang gaw uhpung kaga byin wa ai le. Anhte gaw KIO, KIA sha rai n’na, mung shawa ra ai hpe galaw ga ngu n’na, yawng hpe e gahkyin gumdin ai, machye machyang jaw ai, jasu shalawt ai dai she re law.

Du Kaba Lasang Awng Wa gaw Wunpawng Mungdan Shanglawt Hpung, KIO, a Myusha Shimlam Dap ningbaw Usa rai n’na, January shata KIO Ginjaw hta byin ai majaw Miwa Gumsan mung de koi yen mat n’htawm ya ten hta New Democratic Army-Kachin, NDA-K, Ginjaw Pang Wa mare hta shanu nga ai rai nga ai.