Du Kaba N’ban La hte Interview

January 21, 2004

The Kachin Post; Ya hte na KIO Ginjaw hta byin mat ai manghkang gaw hpa majaw byin wa ai rai? 2001 ning February shata hta byin ai Coup hte matut manoi nga ai i?

Du Kaba N’ban La; Ya hte K.I.O Ginjaw kaw byin ai manghkang gaw 2001 Ning byin lai wa sai manghkang hte hpa n seng ai. Myu tsaw myit ning chyun shanang ai Du Salang n kau mi hte Mungshawa n kau mi a majaw byin wa ai re ngu mu lu ai. Shanhte gaw rawt malan ten naw re ai hpe n dum kau ai. Shang Lawt lu sai zawn shadu kau ai. “Mung shawa a n’sen” ngu tang shawn ai laika gaw n shut ai. Raitim mungdan ngwi pyaw sim sa ai hpang galaw ai baw bungli she re. Ya ten grai naw jau ai.

The Kachin Post; N'dai hku byin wa ai gaw Du Kaba hpe KIO Ginjaw Salang ni n ra sharawng ai majaw shara kaw na shapraw kau mayu ai majaw re i? N rai yang hpa majaw n re ai lam sanglang dan ya rit.

Du Kaba N’ban La; Ngai galaw taw nga ai Dap Awn Daju (Chief of Staff) magam bungli gaw nye atsam marai machye machyang hte galaw ai baw n re. Dap shawa tsang hte tsang Ginjaw Salang ni kaw na hkawt shatsam ai majaw galaw ai re. Madu Karai Kasang nan mung ngai hpe lit n dai gun hpai shangun ai lam re. Tim hkye hkrang la ai wa madu Ye Su a lam, ja chyum mungga hte sawk sagawn yu yang grau sang lang na re ngu kam ai.

The Kachin Post; KIO hta n'dai zawn rai Daru Magam kashun hkat ai lam ni htawm hpang hta nga wa na shadu ai i? Nga wa yang KIO hku na gara hku hparan na ngu hkyen lajang da ai lam ni nga ai i?

Du Kaba N’ban La; Karai Kasang a man hta mung, Mungshawa a man hta mung, magam gun dap shawa a man hta mung, myit hpraw san ai hte kangka sadi dung woi awn sa wa yang kaning re ai manghkang hpe mung tawt lai lu na re. “Ra hte marit” n bung hkat ai majaw htawm hpang de ndai zawn n byin na re ngu n mai sawn la ai. Teng man ai lam hte Karai Kasang lawm ya na re. Hpa n tsang ra ai.

The Kachin Post; KIO a Policy Maker Ginjaw Salang ni a Mungmasa Policy hpe Du Kaba ra sharawng ai i? Gara hku mu mada ai rai?

Du Kaba N’ban La; K.I.O gaw nye hkum, nye asak re. Hpa majaw nga yang K.I.O a policy gaw Jinghpaw Wunpawng Amyu Sha ni a lawt lu lam hta mung masa lam, hpyen masa lam law law hpe tawt lai n’na, lapai lahkra n yit ai woi awn nga ai majaw nye hkum hte asak rau rai nga ding sa madi shadaw nga na re.

The Kachin Post; Myen Hpyen du Khin Nyunt a National Convention de KIO sa du lung ai marang e KIO hte anhte Jinghpaw Wunpawng Myusha yawng a matu gade daram akyu lu na ngu shadu ai rai?

Du Kaba N’ban La; K.I.O a policy gaw “gasat n’na bawngban, bawngban n’na gasat” ngu ai re. Shawng de mung (3) lang bawngban lai wa sai hpe yawng myit dum nga na re. Jinghpaw Wunpawng Amyu Sha ni a matu san san hkung-ga tai let ap nawng nga ai uhpung utsa re kam mu.

The Kachin Post; Lama wa Kachin National Organization KNO ni a masing awng dang mat n'na Khin Nyunt a National Convention hpe woi ninghkap wa ai rai yang Jinghpaw Wunpawng Myusha ni matu gara hku akyu amyat lu na rai?

Du Kaba N’ban La; K.N.O mung Jinghpaw Wunpawng Amyu Sha ni a matu nga n’na hpaw shabawn sa wa ai gaw rai ma ai. “Ningnan sha chye hkawm ai ma chyangai” hte naw bung ma ai. “Shawng de ninggam grai sung ai shara nga ai” hpe garai n chye, n mu ma ai. Hkrit hpa wa re. Rap ding hkala nga ai lu.

The Kachin Post; Ya ten hta Jinghpaw Wunpawng Mungshawa ni hku na KIO, KIA hpe gade daram madi shadaw ai lam nga ai rai? Madi shadaw ai rai yang hpa majaw madi shadaw ai rai? Ya hte na Ginjaw de tangshawn ai “Mungshawa ni a n’sen” nga ai gaw Mungshawa yawng a ra sharawng ai lam ni re ai i?

Du Kaba N’ban La; K.I.O ngu ai gaw Mungshawa daw tsa nyep, myi prwi, asak, dubaw law law hte gaw gap da ai K.I.O re. Mung shawa n madi shadaw yang gaw Myen Mung Communist Party (CPB) hkrat sum mat ai zawn dai ni na Internet hkan K.I.O hpe amyu myu nga jahpyak ka ningdau chye ai “n’gyi ma yaw” ni hpa pyi n chye mat na sai. “Mung shawa n’sen” ngu ai gaw ya hte Ginjaw du ai mung shawa ni hpe san yu u. Yawng malap kau na masai.

The Kachin Post; Wunpawng Mungdan Shanglawt Hpung KIO a yaw shada da ai Shanglawt Mungdan gawgap na gaw galoi ten hta hkrang shapraw lu wa na rai?

Du Kaba N’ban La; Wunpawng Mungdan Shanglawt Hpung (KIO) a yaw shada ai pandung shadaw du lu na gaw Jinghpaw Wunapawng Amyu Sha ni yawng gaw, “policy langai, ladat langai, yaw shada ai pandung shadaw langai, ningsam langai, ningsen langai, matsun langai” a kata kaw lahkrip ra ra hkan nang hkan sa chye jang myit mada yaw shada ai pandung shadaw de aloi sha du lu na re.

The Kachin Post; KNU hte Myen Hpyen du ni simsa lam matu hkrum shaga ai lam hpe Du Kaba hku na madi shadaw ai lam na lu ai. Myen mung ting a mungmasa manghkang hpe hparan lu na mahtai gaw hpa baw rai?

Du Kaba N’ban La; Teng ai. K.N.U hte myen hpye asuya ni simsa lam a matu hkrum shaga ai lam hpe madi shadaw n ngai. “Pyilam la gasat yang lamu du ai da.” Manghkang hpe hparan na matu gaw saboi n’tsa kaw hparan yang chyu sha teng man ai mahtai lu na re. Munghpawm Myen Mungdan ting simsa lam lu na matu gaw n law ai bum nga masha ningbaw ningala ni hte teng man rap ra ai tara hpe tam yang chyu sha mahtai lu na re.

The Kachin Post; Anhte Jinghpaw Wunpawng Mungdan hpe lani mi hta Democracy mungdan langai byin tai wa na hpe ra sharawng ai i? Ahkaw Ahkang gaw Mungshawa ni a lata hta rai ra ai ngu ai hpe hkap la ai i?

Du Kaba N’ban La; Ndai lam ni hpe ra sharawng ai majaw anhte Wunpawng amyu ni myit mang lanagai pandung langai hte rawt malan gasat sa wa ai shaning (44) ning hkran de kap wa saga ai. Nang i dum i?

Du Kaba N’ban La gaw Wunpawng Mungdan Shanglawt Hpung Hpyen dap KIA a Dap Awn Daju (Chief of Staff) rai n’na 2004 ning January shata praw hta KIO Ginjaw de shi a hpyen hpung hte lung wa let dai kaw byin nga ai manghkang hpe sa hparan ai wa rai nga ai. Laiwa sai 2001 ning February shata hta mung KIO Ginjaw a Daru Magam zing la n’na Du Kaba Mali Zup Zau Mai hpe shara kaw na jahkring kau ai wa mung rai nga ai.