KNCD ningbaw hte San Htai

Kachin Post shi laika hku n'na KNCD (Kachin State National Congress for Democracy) ningbaw Du Wa Zau Ing hte November shta 11 ya shani hta Jinghapw Wunpawng myusha yawng hte seng n' na tara shang Pati langai hku galaw sa wa nga ai mung masa lam ni hpe san htai galaw da ai rai nga ai.

Kachin Post; UN dat kasa Razali hte hkrum ai shaloi KNCD hku na hpabaw lam ni hpe tang shawn na rai?

Zau Ing; Ya tang madun na gaw man-hkrum zuphapwng (dialogue) galaw na, anhte n'dai mung masa shamu shamawt lu na ahkang dawm kau ya ai Pati ni hpe tara shang shamu shamawt lam jaw na hte mung masa bawng masha ni hpe dat ya na matu re.

Kachin Post; Razali hte galoi hkrum na rai?

Zau Ing; N'dai shata 15 ya shani hkrum na re.

Kachin Post; Dai shaloi hpa baw lam ni hpe tang madun na rai?

Zau Ing; Ya na lang gaw anhte [United Naitonalities Alliance- UNA] hku na tang madun ai lam ni grai law sai re majaw shi [Razali] a n'sen naw madat na hku re. Shi hpa baw tsun wa na hpe shawng madat na re. Hpa majaw nga yang anhte tang madun ai grai law sai, n'dai lang hte rai yang 9 lang rai sai.

Kachin Post; Ya hte sha ningnan hpaw hpang wa ai Mungbawng Rapdaw hte seng n'na gaw KNCD ni hku na gara hku mu mada ai rai?

Zau Ing; Dai hte seng na gaw shahte[Mungbawng Rapdaw] a 'policy' hpa re atsawm garai n chye ya ai shi ai. Dai re majaw manang ni n'kau mi gaw shang yang mai ai nga n shang yang mung mai ai nga amyu myu tsun nga ai. Raitim shanhte a galaw sa wa na lam hpe naw yu ra na re.

Kachin Post; Ya shinggan[maigan] de nga ai JW hpung n'kau mi gaw dai Rapdaw hpe nau madi shadaw ai lam n nga ai hku tusn wa nga ai. Dai hte seng na KNCD hku na gara hku tsap na rai?

Zau Ing; Anthe hku na hpa madi shadaw na lam mung n nga ai. N nga ai ngu gaw n'dai hku re, shanhte hpe gaw hpa mung ninghkap na lam mung n nga ai. Hpa majaw nga yang anhte hte bawng ai lam hpa n nga shi ai. Ya ra ai shaloi gaw bawng yang bawng wa ra na re.

Kachin Post; Lama wa Wunpawng Rapdaw hku na bungli jawm galaw mayu ai lam ni jahta wa ai rai yang KNCD hku na gara hku masing nga ai rai?

Zau Ing; Shaloi gaw manang ni hte jahkrup na galaw wa ra na re. Shanhte gaw anhte de shang na lam gaw n loi na re. Hpa majaw nga yang shanhte tsun ai gaw mung masa Pati n re ai nga ai majaw, anhte gaw hpa mi rai rai 1990 ning hta Ra lata hkrum ai tara shang Pati rai taw nga ai. Anhte hte pawng na gaw yak na re.

Kachin Post; Lama wa n pawng hkra raitim ya shanhte na hpang kaw gaw Myen hpyen du ni nga ai re majaw shanhte hku na KNCD hpe aja awa [Pressure] galaw shangun wa ai lam ni nga yang KNCD hku na gara hku galaw na?

Zau Ing; Ngai na ningmu hku rai yang [Pressure] jaw na lam n nga na ngu shadu ai. Ngai chye daram nga yang ya shanhte kata kaw na nan n hkap la ai grai lawm ai. Dai zuphpawng hta mung ningnan galaw ai lam gaw amyu mi, ya byin wa ai gaw amyu mi rai taw nga ai. Dai kaw mung anhte hte myit hkrum ai ni grai lawm ai. Dai re majaw ya grai wa n tsang ra na re ngu shadu ai. Shanhte shamu shamawt ai hpe yu n'na she mai daw dan na masa nga ai. Ngut na ai n rai yang gaw shanhte kata kaw na nan n hkap la ai lam ni pru wa na re ngu mu mada ai.

Kachin Post; N'dai Mungbawng Rapdaw hpe U N A kaw lawm ai kaga myusha Pati ni gaw gara hku mu mada ai rai?

Zau Ing; Dai lam hpe KNCD hku n'na bungli rau galaw nga ai jinghku myusha Pati ni hpe tang madun na lam nga ai.

Kachin Post; Dai myusha Pati ni Mungbawng Rapdaw hpe gara hku mu na ngu shadu ai rai?

Zau Ing; Grai gaw myit hkrum na lam n nga ai. Hpa majaw nga yang Mungbawng Rapdaw a Statement kaw na nambat 5 hpe n hkap la na re. Ya dai gaw gadai mung n hkap la ai rai nga ai. Anhte a manang ni mung hkap la na n re. Shanhte hpe n san tim dai sha rai na re.

Kachin Post; Ya ten hta Mungbawng Rapdaw hku na n'dai zawn re Myen hpyen du ni woi awn na galaw na 'National Convention' hpe galaw na matu hpyi shawn wa ai hte mare maga mi de na mung National League for Democracy (NLD) ni woi awn na galaw nga ai Committee Representing the People's Parliament (CRPP) hpe n'gun shadat wa ai shaloi KNCD hku na gara hku shamu shamawt na rai? KNCD hku na CRPP de shang na lam ni nga ai kun?

Zau Ing; KNCD gaw shang tim mai ai. Raitim anhte gaw UNA hpe n'gun shadat ra ai re majaw ya ten hta gaw masa hpe naw yu ai hku re. Anhte kaw shang na ahkaw ahkang nga ai. Ra ai shaloi shang ang yang shang na re.

Kachin Post; Lama wa KNCD hku na tara shang shamu shamawt ai lam lu yang gara hku shamu shamawt wa na rai? Shang lawm wa na masha ni nga ai i?

Zau Ing; Shang lawm wa na ni law law nga ai. Dai ni gaw ya anhte ni hpe tsawm ra hkap la ai ni ni re.

Kachin Post; KNCD kaw galaw nga ai ni a shim lam hte seng n'na gaw gara hku rai?

Zau Ing; Shim lam hte seng na gaw tsang ra ai lam ni nga ai. Myen hpyen du ni hku na ya hte sha Myitkyian kaw shang jep ai lam ni nga wa ai re majaw shamu shamawt na matu yak ai hku re. Anhte gaw yawng hte matut na galaw mayu ai. Grau n'na anhte gaw Myitkyina kaw na sa ai re majaw sa sa wa wa yak ai hku re. Yangon kaw rai yang gaw tsun shaga na lam grau lu ai. Tsawm ra sadi na galaw nga ai a'ten naw re. Pati rung hpaw na ahkang lu hkra mung shakut nga ga ai.

Kachin Post; Hpang jahtum hku n'na ya ten na Jinghpaw Wunpawng mung masa lam hte seng n'na KNCD hku n'na gara hku mu mada ai ngu ai hpe yanwng chye na matu tsun dan ya rit.

Zau Ing; Mungbawng Rapdaw hpaw ai hpe mung maga mi hku na kaja ai ngu shadu ai. Shamu shamawt ai lam gaw myusha yawng mung, mung masa hte seng n'na gasu hprang wa ai lam nga ai. Dai re majaw shinggan hkan nga ai ni, Kata hkan nga ai ni yawng mung shamu shamawt ra wa na re. Hpa majaw nga yang anhte kata kaw nga ai ni mung ya gaw yawng maja wa ra ai re majaw moi na zawn majoi mi dung nga n mai sai hku re. Shi aten du ai ga rai nga ai hku re.