Jinghpaw Mungdaw Ninghtoi hta
The Kachin Post / January 10, 2007

Myitkyina majoi Shatapru Manau wang kaw grai hkik hkam ai hku nau nga ai 59 lang na Jinghpaw mungdaw n’htoi Manau gaw anhte Jinghpaw Wunpawng amyu sha ting a matu kabu gara hte buga shara shagu na sa du ai hpu nau ni hte rau hkrum zup ka manawt lu ai shani langai rai nga ai. Raitim, n’dai Manau poi a galaw ai a majaw anhte ni yawng matu akyu amyat pru hpa lam nau n nga ai hpe mu ai.

Jinghpaw mungdaw n’htoi Manau poi hpe ningtsa lam hku yu yang, shanglawm ai ni yawng kabu gara hte ka manawt nga ai zawn mu ting, kaja wa ya dai ni na Jinghpaw mungdaw ngu ai lamu ga hta nga pra nga ai anhte amyu sha ni gaw lani hte lani grau grau n’na she nga yak hkak jam jau let, makawp maga hkye la na Karai hpe marawn jahtau ra nga ai prat rai mat sai.

Anhte Jinhpgaw amyu sha ni moi de tinang buga hta Madu hku n’na Du tai uphkang lai wa sai ni rai ga ai. Ya dai ni gaw n dum shamyi hte masha maigan amyu a mayam tai wa nga sai hpe chye yu ai ni mu na shadu ai. Maga myi hku yu yang, Myen e masat ya ai Jinghpaw mungdaw n’htoi ngu ai gaw anhte amyu sha ni matu mayam prat hpang wa ai n’htoi ngu pyi mai tsun ga ai.

Hpa majaw nga yawng ya dai ni 2007 ning January 10 ya hta galaw nga Jinghpaw mungdaw n’htoi poi hpe Myen atsuya hku n’na ahkang n jaw yang mai galaw na n rai nga ai. N’dai hpe yu yang anhte amyu sha ni a tiang amyu sha langai hku n’na lu gying lu ang ai ahkaw ahkang hkyep myi pyi n nga ai hpe mu lu ai. Dai hte maren, 2006 ning hta galaw ai poi hta mung Myen Pya Zat hpe n shalawm yang poi galaw ahkang n jaw lu ai nga ai majaw Manau poi hta Myen Pya Zat hpe shalaw ya ra ai madang rai mat ai.

N’dai mabyin masa ni hpe yu yang, anhte Jinghpaw Wunpawng amyu sha ting a shim lam gaw grai tsang ra ai madang rai saga ai. N’dai zawn re ai ten hta anhte amyu sha ni gaw hpa hpe hkrak galaw na n chye shi ai sha n ga, ramma ni mung wam wam dam dam hte tinang a prat myit mada shara mat let, nang hpam kani lu sha let si ru ma wa nga ai gaw yawng chye chyalu rai na shadu ai.

Ya ten hta anhte amyu sha ni a sut masa, hkamja lam, laika hpaji hte kaga lam amyu my mung Myen hpyen atsuya a pat hkum da ai lam amyu myu a majaw, lani hte lani hkrat sum nga ai hpe mu lu ai. Grau n’na hkrit tsang ra ai gaw, n’dai zawn re mang hkang ni hpe kadai atsuya, gara uphpung uhpawng hku n’na mung hkrak tup lit la hparan ya ai lam n mu shi ga ai. Dai hte maren ru yak jam jau hpe hkam sha nga ai anhte amyu sha ni nan Maigan amyu ni tinang hpe dip sha nga ai chye ninglen gara hku ninghkap n’na, tinang a amyu sha, buga hpe gara hku makawp maga na ngu ai hpe atsawm n chye na shi ai hpe yu yang grai yawn hpa rai nga ai.

Myen hpyen atsuya hte gap hkat jahkring lam galaw n’na buga gaw sharawt lam galaw nga ai ngu jahtau nga ai Wunpawng Mungdan Shanglawt Hpung, KIO, hte New Democratic Army-Kachin, NDA-K, ni mung ya dai ni Jinghpaw mung hta byin nga ai mang hkang ni hpe n chye mu ai gaw n rai na shadu ai. N’dai uhpung ni a buga gaw sharawt ai lam ni kade daram awng dang nga sai kun gaw n chye sai, anhte Jinghpaw mung na Hpun maling ni lani hte lani krin wa ai, lamu ga, Hka shi ni mung lani hte lani hten za wa nga ai lam ni hpe gaw mung chying sha ni yawng chye nga ga ai. Grau n’na gaw, anhte buga na lamu ga ni hpe lawu ga na Sahtawng n htu ai Myen amyu ni yawng madu kau wa nga sai.

N’dai lam ni hpe Jinghpaw Wunpawng amyu sha ting lawt lu lam lu hkra shakut nga ai ngu jahtau nga ai uphung uhpawng ni dai hku sha yu shalai kau na kun? Na lu ai daram nga yang, mung chying sha ni gaw, amyu sha ting lawt lu lam matu shakut nga ai uphung uhpawng ni hpe kam hpa ai lam mung n nga, ding lun ai lam mung n nga rai wa nga ai. Mung chying shan ni hku n’na n’dai uhpung uhpawng ni hpe jahpan hta nau n bang wa sai ngu buga na ramma law malawng tsun nga masai. “Tiang uphkang ai ginra na N’hprang rai htu shaw na hpe pyi Myen atsuya de ahkang hpyi ra ai uhpung hpe gaw gara hku kam mai na,” ngu Myitkyina na ramma langai tsun ai.

Buga nga yumaya mung chying sha ni matu gaw grau grau n’na myit mada lam n nga ai ningsin chyip re ai prat de kanig n di hkawm sa ra nga saga ai. N’dai masa hku she anhte amyu sha ni matut hkawm sa nga yang gaw, htawm hpang na anhte amyu sha ni prat gaw myit sawm yu pyi n gwi na zawn she rai mat nga sai.

Raitim, amyu tsaw ai mung chying sha ni matu myit mada lam langai gaw nga ai. Tinang hkum tinang kam hpa let, amyu sha ting a matu tinang galaw ang ai hpe hkrak tup galaw n’na, masha a mayam prat na lawt lu ai, ahkaw ahkang lu ai, mungdan lu ai amyu sha byin tai wa hkra zai ladat hkrak hte bungli hpang ra saga ai. Mung chying sha rawtmalan bai hpang ra saga ai.

Tiang buga hta madu tai mayu ai amyu tsaw mung chying sha ni gaw tiang hpe mayam shatai nga ai hpyen wa a ahkang hte she nau lu ai Manau hta shanglawm na gaya ga ai.