NC Ni Wa Yang
September 18, 2006

The Kachin Post

October shata praw hta Myen hpyen atsuya woi galaw na National Convention, NC, hpang wa sana rai nga ai. N’dai lang na galaw na NC gaw 1993 ning kawn hpang wa ai mungdan a ningpawt ninghpang Upadi hpe ginchyum dat shangut na matu re lam, shiga ni hku chye lu ai.

N’dai lang na NC hta Myen hpyen atsuya ra sharawng ai hte maren anhte Jinghpaw Wunpawng lak nak lang hpung ni mung teng sha sa du shang lawm na matu shajin nga ma ai lam chye lu ai. N’dai hta Wunpawng Mungdan Shanglawt Hpung, KIO, na dat kasa ni shang lawm lam hpe loi dinglik mayu ai.

KIO gaw 2003 ning hta bai hpang wa ai NC hta maram masam ai madang hku n’na shang lawm hpang wa let, 2004 ning hta galaw ai NC hta gaw tara shang dat kasa marai 5 dat let shang lawm wa sai. NC hta KIO shang lawm ai hte seng n’na, KIO ningbaw ni galoi mung tsun nga ai ga langai nga ai; anhte a matu lu mai ai daram ahkaw ahkang ni hpyi yu na matu shang lawm ai lam, lama n shang lawm yang hpa mung lu mai na n re lam, tsun ai hpe na yu ga ai.

National Convention hte seng n’na teng sha mai tsun ai gaw, Myen hpyen du ni hku n’na NC hpe galaw let shanhte ni ra sharawng ai mungdan a gawda Upadi hpe, gadai mi hpa myi tsun tsun galaw shagrin la wa na rai nga ai. Myen mung na mung masa hta mai byin wa ai lam ni gaw 2006 ning htum hkan NC hpe shangut kau n’htawm, 2007 ning hkan gaw mungshawa rasharawng hkamla lam galaw let NC hta lu tawn ai lamang ni yawng hpe ta tut jai lang wa na hpe sawn yu lu ai.

NC de shang lawm yu ai, bawngban yu ai, tinang amyu sha ni a ahkaw ahkang ni hpe tang madun yu ai dat kasa ni grau chye na shadu ai, NC gaw Myen amyu kaba ni, grau n’na Myen hpyen du ni a matu part dinsa Myen mung ting hpe shanhte ra ai hku uphkang lu na tara shang ahkaw ahkang lu na matu shagrin ya nga ai mung masa poi langai re ai hpe. Raitim, NC hta sa du shang lawm nga ai dat kasa yawng ngu na daram gaw tinang hkrai a ra sharawng myit hte sa lung ai ni n lawm na shadu ai.

N’dai zawn mung masa mabyin hta, Myen hpyen dap hte gap hkata jahkring tawn ai KIO zawn re lak nak lang hpung ni matu NC lung ra ai lam gaw n galaw n mai bungli langai rai nga ai. NC n lung na nga yang Myen hpyen dap kaw gara hku matai htang wa na ngu ai hpe gap hkat jahkring hpung ni chye na ai zawn, NC de sa lung n’na, tinang amyu sha ni ra sharawng ai mung masa ahkaw ahkang ni lu wa na n re ai hpe mung mu nga ai majaw, labau hta tara hkam tai na mung n kam ai ningbaw ni nga ma ai hpe mu lu ai.

Maram yu ai daram nga yang, amyu sha gap hkat jahkring hpung yawng ngu na daram gaw, NC sa lung ai n’hkan e Myen hpyen dap hte kalang ta manghkang byin na lam n nga ai majaw rai na shadu ai. Raitim, Myen hpyen dap gaw NC ngut ai hpang gap hkat jahkring hpung ni hpe ladat amyu myu hte shamyit kau na matu masing jahkrat na galaw nga ai lam ni gaw yawng mu chye nga ga ai.

Galaw mai ai lam ni gaw nga ai. NC sa lung n’na akyu pru na n re ai hpe chye nga sai gap hkat jahkring hpung hkan na ningbaw ni gaw, October shata praw hta bai hpang wa na NC de gara masing masa hku, ganing re ai dat kasa ni hpe gara madang hku dat n’htawm, NC ngut yang tinang a uhpung mying mung n hten, labau hta myit man ka na lam mung n byin hkra galaw ra sai gaw, ya dai ni NC de sa lung na matu shajin nga ma ai KIO hte amyu sha gap hkat jahkring hpung ni a lit rai nga ai.