Myen a Simsa Lam Masu January 5, 2006
The Kachin Post
Ngwi pyaw ai 2006 ning shaning n’nan hta anhte Jinghpaw Wunpawng amyusha ni matu gaw n tsawm htap ai mabyin masa hte hpang wa sa ga ai. January praw 2 ya hta Sam mung Namti mare kaw jung tawn ai Wunpawng Mungdan Shanglawnt Hpung, KIO, a Muse ninghtawn rung na magam gun marai 5 hpe Myen Hpyenla ni akajawng sha gap sat kau sai. N’dai mabyin a majaw anhte Jinghpaw Wunpawng amyusha ni yawng gaw Myen Hpyen Atsuya a ‘Simsa Lam’ ngu ai ga baw hte ngam nga ai amyusha ni hpe mayam shatai mayu ai masing hpe asan sha mu lu saga ai.
Sam mung Namti mare na mabyin hpe yu ga nga yang, KIO Muse ninghtawn rung hpe shang gap ai ni gaw Muse mare kaw jung tawn ai Hka La Ya 68 na Major Hla Moe hte shi a hpyen ma ni rai nga ai. Dai aten hta Sam mung Sinpraw-Dingdung mayan hkan Myen hpyen dap hte Shan State Army, SSA, ni majan byin nga ai rai ai sha n nga SSA na hpyen hpung langai hpe atik anan hkan tam nga ai aten mung rai nga ai. Grau n’na gaw, dai shani hta SSA Dapba 241 na Du Kaba Hkung Kyaw hte shi hpyen ma ni hpe lu rim ngut ai hpang byin ai manghkang rai nga ai.
N’dai hpe yu yang, Myen hpyen dap hku n’na KIO/KIA ningtsa masing nga nga hte hpyen masa, mung masa hku amyat htuk ai rai nga ai. Myen hpye dap sha sadi dung ai rai yang, 1994 ning kawn gap hkat jahkring lam la da ai KIO hpe mara kata shang gap na lam n nga na re. Gran n’na gaw KIO/ KIA a masing masa hpe chyam dat ai sha n’ga, Myen hpyen dap hku n’na KIO/KIA hpe shamyit kau mayu ai masing a majaw rai nga ai.
Asan sha re ai lam langai gaw, Major Hla Moe woi awn ai Myen hpyen la ni gaw tsa nang n’na shang gap ai mabyin zawn byin hkra galaw ai raitim, Myen Hpyen Dakkasu, DSA, yu Major Hla Moe nang shang lawm ai re majaw, lahta na matsun re ai hpe asan sha mu lu ga ai.
Lai wa sai 2001 ning March 22 ya hta Sam mung Si Za Pa mare kaw KIA hpyen la marai 9 hpe Myen hpyen dap kawn majoi mi gap sat kau ai hpe bai yu yang 2006 ning hta byin ai mabyin gaw KIO sha n’nga anhte Jinghpaw Wunpawng amyusha yawng hpe roi ai ga nan re. Masha n sawn ai ga nan re. Gap hkat jahkring lam la da ai nga n’na sadi n dung ai ni hpe gaw tinang shawng lata lawan ra na sha du ai.
Ya daini Sam amyusha ni a mabyin hpe yu ga nga yang, Sam ningbaw ni rai nga ai Hkun Htun Oo, Hso Ten ni hpe htawng 100 jan ning du hkra bang da ai lam, Sam uhpung uhpawng kata hta zang ayai wa hkra sumprat dawk ya nga ai lam hte, Sam amyusha ni hpe kam ai hku roi rip nga ai lam ni hpe Myen hpyen dap hku n’na ninggawn masing jahkrat let galaw nga ai hpe yawng chye ga ai. Hpa majaw dai hku byin ai i nga yang, sam rawtmalan hpung ni hku n’na Myen hpyen atsuya hpe grai shagrin shanem ai ladat hku mung masa ginsup ai majaw rai nga ai.
Yawng chye ai hte maren ya dai ni na Myen hpyen dap ningbaw ngu ai ni gaw Myen mung hta Myen amyusha ni sha nga-mu nga-mai na matu ladat amyu myi hku n’na Myen n re ai amyusha ni hpe roi rip nga ai re. Myen amyusha ni a matu sha gaw gap shagreng nga ai ni re. Ya National Convention ngu ai hpe galaw let shanhte ra sharawng ai Myen mungdan byin tai wa na matu galaw nga ma ai. National Convnetion hta sa du lung nga ai amyusha gap hkat jahkring hpung ni mung tinang a ningmu tang shawn na hkum tsun, hpa n mai shaga ai lam na lu ai. NC hta KIO hku n’na shang lawm nga ai mung masa a majaw ningdang n htuk ai majaw rai na shadu ai. Raitim, mungdan langai, amyusha langai hte seng ai rawtmalam galaw nga ai prat hta gaw tinang amyusha akyu amyat lu, n lu ngu ai lunghkret hta shen yu n’na galaw yang she awng dang na re.
Kaja wa nga yang KIO Muse ninghtawn rung magam gun ni gap sat katut ai hte kalang ta Nyaunghnapin kaw NC lung nga ai KIO dat kasa ni yawng hpe dawm kaw yang kaja na shadu ai. Galaw yang mai byin na ngu mung shadu ai. 2005 ning December shata hta bai hpang ai NC hta New Mon State Party, NMSP, hku n’na shahte a dat kasa n dat mat sai re. Lung tim lachyum n pru ai majaw re nga ma ai. KIO hku n’na hpa majaw n mai galaw na rai. Anhte amyusha yawng a shari shadang hpe sha gaw tau n’na NC lung nga ai KIO dat kasa ni Nyaunghnapin kawn wa n’na Muse ninghtawn rung magam gun ni a mangbru poi de shang lawm yang kaja na shadu ai. Lachyum n pru ai NC sa lung n’na labau a tara hkam KIO hpe n byin shangun mayu ai.
Hpa myi raitim, n’dai lang byin ai manghkang hpe KIO langai matu sha n nga anhte amyusha yawng a akyu ara hte shim lam a matu ahkyak kaba shatai let ra ahkyak ai masing ni hpe lahkam sa ra saga ai. Dai n re ai sha, 2002 ning na manghkan zawn shazim kau ai rai yang gaw KIO a masing masa ni gaw anhte Jinghpaw Wunpawng amyusha ting a ra sharawng ai lam ni hpe n gawn n sawn di ai, nyet wa ai ga nan rai nga ai.
KIO ningbaw ni sha n’nga anhte Jinghpaw Wunpawng amyusha ngu asak hkrung nga ai kaji kaba yawng chye na da ra ai gaw, Myen Hpyen Du ni Myen mung hpe up sha nga dingsang galoi mung sim sa lam hte seng n’na tsun shaga na lam n nga ai sha n ga, anhte amyusha ni a ahkaw ahkang mung lu na lam n nga ai. Shahte a masu magaw, pale palau ai mung masa ladat amyu myu hte anhte amyusha ni hpe zang ayai hkra di n’htawm mayam shatai na sha rai nga ai. Dai ni anhte Jinghpaw mung kaw anhte amyusha ni hpa byin nga ai yawng chye na shadu ai. Mayam ngu n tsun ai sha re, Myen a mayam tai nga ga ai. Dai majaw, tinang a shan hpe pyi sep sha gwi ai Myen Hpyen Du ni a matsap shabat re ai mung masa ladat ni hpe ninghkap na gaw anhte Jinghpaw Wunpawng mungchying sha yawng a lit nan rai nga ai.
