Manau hpe Hka hte Kashin N mai April 11, 2005
The Kachin Post
Mungkan ting hta Manau nau ai amyusha ngu na nga pra nga ai gaw anhte Jinghpaw Wunpawng amyusha ni sha rai nga ai. Manau hte she asak hkrung, asak matut nga ai amyu sha ni nan rai nga ai. Dai hte maren Manau nau ai Manau Pa hte Manau shadung ngu ai gaw anhte amyu sha ting a ahkyak dik htum ai ‘Amyu Sha Masat Dingsat’ (National Symbol) rai nga ai.
Ya n’dai bat laman hta Myitkyina mare na anhte amyu sha ting a masin salum, sindun shara rai nga ai Sharapru Manau Wang hpe Jinghpaw mung na Myen hpyen uphkang Du Maung Maung Swe a ahkang hte Sut Du Yup Zau Hkawng a Jade Land Myanmar Company lit la n’na, Myen ni a shaning ningnan Hka Jaw Poi (Thingyan) hpe wu wu di galaw na matu hkyen lajang nga ma ai lam, Myitkyina mare masha ni tsun nga ma ai. Manau wang kaw Hka Jaw Poi galaw let Miwa manam ni hpe woi pyaw na nga ma ai.
Lai wa sai ten hta mung Myitkyina mare hta Hka Jaw Poi hpe mare na lam n’maw kaba hkan Hka Jaw Htingnu ni shachyaw let galaw lai wa sai re. Myen mung na Yangon, Mandalay zawn mare kaba hkan mung Hka Jaw Poi hpe gaw Lam n’maw kaba hkan she galaw ma ai. N’dai zawn re lak san Manau wang kata kaw galaw ai lam labau hta mung n na yu ga ai.
Grau n’na, dai ning hta Mandalay mare hta Thai, Lao, Cambodia, Vietnam, Myen hte Miwa mung Yunnan mungdaw ni yawng shanglawm galaw na Hka Jaw Poi kaba hpe galaw let Maigan Bu Hkawn manam ni hpe sa du chyai lawm na matu saw shaga nga ma ai.
N’dai ten hta Myitkyina mare Manau wang kaw Hka Jaw Poi galaw let Miwa manam ni hpe saw shaga ai ngu ai gaw lachyum n pru ai bungli langai rai nga ai. Anhte amyu sha ni a manu dan ai Manau Htung Hking hte labau ni hpe Myen htung hking hte kapyawn gayau let n gawn n sawn di ai lam sha rai nga ai. Manau wang kaw Hka Jaw Poi galaw ai lam gaw, labau hta Jerusalem mare hten run mat n’na Israel amyu sha ni a chyoi pra Nawku Htingnu hpe maigan amyu sha ni Shawa dap shatai let n gawn n sawn di ai hte bung nga ai.
Manau Wang kaw Hka Jaw Poi galaw ai ngu ai gaw Myen a htung hking hpe anhte amyu sha ni hpe jai lang chye wa na matu shaman ya ai mung mai byin nga ai. N’dai zawn amyu kaba langai a htung hking hpe jai lang wa hkra ningshawng dat ai lam mung Myen ni a amyu kaba ladat, masing kaba langai nan re hpe maram mai ga ai.
Hka Jaw Poi galaw na hte seng n’na Myitkyina mare na Hpung salang kaba langai tsun ai gaw, “Kaga amyu sha ni a makam htunghking she lang na rai yang gaw, anhte Wunpawng sha ni a Nat Jaw htung hpe mahtang bai lang yang grau hkrak na re,” nga n’na tsun wa ai. Anhte a Ji-Woi, Ji-Wa ni dawjau wa ai Nat hpe pyi kabai kau n’na Hkristan masham hpe manoi manat nga ga ai anhte Jinghpaw Wunpawng amyu sha ni wa Myen a “Buddha” makam masham a htung hking ni hpe jai lang na ngu ai gaw labau n tsawm ai lam rai nga ai.
Grau n’na ya ten hta, Hkristan makam masham hpung shagu ramma dabang ni hpaw lu hkra shakut nga ai ten hta, ramma ni hpe Hka Jaw Poi hta Wunpawng htung hking bu-hpun-palawng ni hte shang lamw yang marai mi Myen gumhpraw 30,000 jaw na nga ai gaw “N-goi La Tum (Rainbow) hpe n’sam langai sha shatai mayu ai” masa nan rai nga ai. Lachyum gaw amyu kaba ai Myen gaw shi a htung hking hpe jai lang let amyu kaji ai Wunpawng sha ni hpe Myen hte n’sam langai sha byin wa hkra galaw shakut ai lam sha rai nga ai.
N’dai lam hpe chye mu n’na, tinang a manu dan ai htung hking hpe prat ram ai ramma ni tsaw ra chye wa n’na, maigan htung hking ni a gunglau ai kaw na makawp maga lu na matu gaw amyu sha ting a lit kaba langai nan rai saga ai.
Manau gaw anhte yawng matu chyoi pra ai htung hking masat masa langai rai nga ai. Manau mat yang, anhte Manau nau ai Jinghpaw Wunpawng amyu sha ni dinghta ga hta sak hkrung nga pra lu na lam shamat sai nan rai.
