Ahkaw Ahkang gaw Mungshaw Lata kaw rai

The Kachin Post

Januanry 10, 2003— Dai ni gaw anhte Jinghapw Wunpawng myusha yawng a 56 ning hpring ai Kachin State day rai nga ai. Raitim dai ni gaw Mungchying sha ni matu yawn hpa n’htoi rai nga ai hpe mu lu ga ai. Maga mi hku tsun ga nga yang Sinat lang n’na n’gun hte Mungshawa ni hpe uphkang nga ai ni a matu gaw aten ladaw gadun na laman awng dang ai n’htoi rai na re.

N’dai bat January 6 ya shani kaw KIO Ginjaw Liaison Bum hta galaw hpang ai Mungshawa ni a n’sen hte seng n’na bawng ban ai zuhpawng gaw mahtai n pru ai sha jahkring kau ra mat sai rai nga ai. Dai zuphpawng hta Buga shagu na Salang ni, Hpung Sara ni the Ramma Ningbaw ni sa du lung ai rai nga ai.

Zuphpawng hta bawng ban ai Mungshawa ni a n’sen gaw anhte myusha yawng a gam maka tsawm htap ngwi pyaw lu na matu KIO a ninggawn masing ni 2004 kaw na galai shai ra sai lam hte, KIO a ahkyak ai Uphkang shara ni hkan Mungshawa ningbaw ni hte gumhpawm n’na uphkang ra sai lam shadut da nga ai. Ngut na KIO ni a Myen hpyen du ni galaw na National Convention de lung na hte seng n’na mung bai myityu na matu tsun wa ma ai.

Raitim KIO hku na gaw Myen hpyen du ni a National Convention hte Mung masa masing ni hpe aging agang madi shadaw da sai lam nga ai majaw Mungshawa ni a n’sen hpe hkap la ai lam n nga ai rai nga ai. Mungshawa ni a tang shawn ai lam ni gaw anhte myusha ni matu kaja htap htuk ai lam ni re ai hpe KIO ningbaw ni chye nga ning len zuphpawng hpe jahten dat ai gaw Mungshawa ni a n’sen hpe hpa n shadu, n’gawn n’sawn di ai nan rai nga ai.

Zuphpaw galaw nga ai laman KIO Ginjaw Salang ni hku na zuphpawng hta sa du nga ai Myusha Shimlam National Security Council ningbaw Du Kaba Lasang Aung hpe ‘Coup’ galaw na hkyen nga ai ngu na KIA hpyen dap de n’dau shabra let hpyen n’gun hte shang rim ai majaw dumbri dumbra rai zuphpawng hten mat ai rai nga ai. N’dai hku galaw ai lam ni gaw ningnan kaw na masing jahtuk let galaw ai nan rai nga ai.

Ya ten hta KIO hku na Hpyen n’gun madun let aten kadun a matu paran lu ai raitim aten galu hta byin wa na mang hkang ni hpe gaw Hpyen n’gun the hkrai lu paran na n re ai hpe gaw chye na ra na re.

Ya dai ni KIO lu tsap nga ai gaw shi a policy jaw na, laknak kaja na, woi awn ai wa kaja na n re ai sha Mungshawa yawng a myu tsaw myit marai san san hte shang lawm n’gun jaw garum ai majaw sha re ai rai nga ai. Dai re majaw KIO n’gun kade mi ja nga ai raitim Mungshawa ni a madi shadaw ai lam n’nga ai shani gaw hkrat sum na rai nga ai.

Dai hte maren, Mungshawa masha ni mung KIO sha n’ga Kaning rai ai Mungmasa hpung a hpang de ‘Myidi Chyip’ hkan sa ai lam koi yen let, Ahkaw Ahkang gaw Mungshawa ni a lata kaw sha nga ai ngu ai hpe chye na kam sham ra saga ai.

Dai re majaw anhte Mungchyin sha ni yawng htawm hpang prat na anhte myushan ni a gam maka kaja wa lu na matu Mungshawa sha Kanu, Mungshawa sha Kawa ngu hkap la kam sham let gwi gwi lahkam sa wa ga ngu shadut dat ga ai.