National Convention hpe Ninghkap Ra

The Kachin Post

September 22, 2003—September shata praw hta Wunpawng Mungdan Shanglawt hpung KIO hku na Myen hpyen du ni bai galaw na lajang nga ai National Convention hpe hkap tau la sai rai nga ai. N’dai hku kalang ta hkap tau la ai lam hte seng n’ang KIO hpung a matu akyu amyat nga ai lam ni nga na raitim mung anhte Jinghapw wunpawng myusha yawng a ra sharawng ai hte ninghtan shai nga ai hpe mu lu ga ai.

Laiwa sai August shata hta Myen mung a Hkringmang Daju byin wa ai Myen hpyen du Khin Nyunt gaw Myen mung democracy gawgap na matu nga n’na ninggam 7 lawm ai mungmasa lam matsun hpe n’dau wa sai rai nga ai. Dai hta 1993 ning hta galaw hpang wa n’na 1996 ning hta bungli n byin ai majaw jahkring da ra ai National Convention hpe bai galaw sa wa na mung masing kaba langai rai nga ai. De hpang e mungmasa ralata poi ningnan bai galaw n’na asuya ningnan gaw de wa na ngu tsun da nga ai.

Khin Nyunt a mungmasa lam matsun gaw ‘Tauba ningnan hte chyaru dingsa lu ai’ lam sha rai n’na hpa mung galai shai ai lam n’nga ai. Ralata poi bai galaw na nga ai mung 1990 ning na ralata poi hpe shamat kau mayu ai majaw sha rai nga ai. Dai hte maren du na ra ai a’ten hta na ralata poi ningnan bai galaw byin yang dai poi hta dang ai ni hpe mung mungdan up na a’hkang jaw na, n jaw na ngu ai gaw gadai mung n lu tsun ga ai.

Dai zawn rai kam n mai ai masing rai nga ai National Convention galaw na hpe KIO hku na kalang ta hkap tau la ai gaw grai myit yu shara nga nga ai. Hpa majaw nga yang lai wa sai lang na National Convention hta KIO gaw tara shang shanglawm lu ai uhpung n rai nga ai. Dai ten hta KIO hte Myen hpyen du ni gap hkat jahkring cease fire galaw ai nau n na shi ai a’ten rai nga tim Myen hpyen du ni gaw KIO hpe laknak jahkrat n’na she dai zuphpawng de shang lawm na a’hkaw a’hkang jaw ai rai nga ai.

Raitim KIO hku na n’dai lang na National Convention gaw grai dam lada ai hku galaw ai rai yang she shalawm na lam tsun wa ai. “Grau damlada ai, grau hkum tsup ai mungmasa pati ni, myusha dat kasa ni mung yawng shang lawm ai hku na galaw wa ai rai yang gaw KIO mung shang lawm na re,” ngu KIO ningbaw langai rai nga ai Du kaba Gauri Zau Seng tsun wa ai. Ndai masa hpe yu ga nga yang KIO yaw shada ai hku dai zuphpawng kaba byin wa ai rai yang gaw Myen mung democracy lu na matu kaja ai ninggam langai hku hkap la mai ga ai.

Raitim Mungkan ting hpe hpa zawn n nawn n’na, tinang ra ai hku sha galaw nga ai Myen hpyen du ni galaw ai magam ni yawng gaw kam n mai ai hte dai lam ni yawng gaw shanhte a Myen hpyen dap Myen mung hpe prat dingsa lu up nga na matu galaw ai lam sha rai nga ai. Dai re majaw KIO madi shadaw ai, n madi shadaw ai gaw shan hte a matu a’hkyak n re ai rai nga ai.

Grau n’na ya ten hta Myen hpyen du ni gaw Mungkan Wunpawng hpung UN a ra sharawng ai hku n hkan sa ai sha n ga Mungdan a democracy ningbaw Aung San Suu Kyi hpe mung rim rawng da ai rai nga ai. Ngut na Myen hpyen dap gaw ya ten hta lai wa sai 15 ning na hte shingdaw yu ga nga yang n gun rawng htum a’ten rai wa ai hpe mu lu ga ai. Dai re majaw shanhte gaw Myen mung mungmasa hta matut na shara lu na matu galoi mung shakut shaja nga na re ai hpe gaw sawn la n shut rai nga ai.

KIO hku na mung National Convention de shanglawm na matut tsun wa ai hta lam amyu myu nga ai hpe mu lu ai. N’dai hku shang lawn na lam hte seng n’na maning Laiza mare hta galaw ai Wungpawng Rapdaw zuphpawng kawn tsun hpang wa ai hpe mu lu ga ai. Dai zuphpawng hta KIO ningbaw n’kau mi National Convention hpe madi shadaw na matu tsun wa ma ai. N’dai lam ni hpe maram yu yang KIO hku na kaja wa shang lawm mayu ai n re ai sha Myen hpye du ni hku na n’gun jaw madi shadaw shangun ai lam ni nga ai hpe mu lu ga ai.

Lama wa National Convention ningnan bai galaw wa ai shaloi mung KIO hku na Jinghpaw Wunpawng myusha yawng hte jahkrup n’na she shang lawm na nga tsun wa ai. Dai lam hte seng n’na Gauri Zau Seng tsun ai gaw “KIO hku sa na kun, Kachin myusha ni hku shang lawm na kun ngu ai gaw mung shawa ni hte jahkrup la na she daw dan na re.”

Raitim Myitkyina nga ramma ningbaw ni the mungshawa ni hku na gaw KIO uhpung langai sha hku National Convention de shang lawm mai ai raitim Jinghpaw Wunpawng myusha yawng a gawng malai hku shang lawm na hpe gaw n ra sharawng ai lam tsun wa ma ai. “Uhpung uhpawng langai hku myit hkawn ai lam nga yang nga na raitim, mi kaw na masing nga chyalu kaw anhte hpe gang bang ai sha re, dai re majaw mung shawa yawng a malai hku na gaw mung masha ni n hkap la ai,” ngu Myitkyina na ramma ningbaw langai Kachin Post de tsun wa ai.

Anhte Kachin Post hku na gaw KIO hku na National Convention de shanglawm na matu yawshada ai lam hpe gaw uhpung uhpawng langai a a’hkaw a’hkang langai hku na mai shang lawm ai raitim, dai hku shanglawm wa ai shaloi mungchying sha ni yawng a madi shadaw ai lam n ga ai sha myusha yawng a malai hku mying gang let shang lawm ai hpe gaw ninghkap ga ai. Grau n’na Myen hpyen du ni woi galaw ai magam hta hkan sa n’na anthe myusha ni lam dam let yak hkak jam jau hkrum na hpe grai tsang ga ai.