Masat Ya ai; Hpaga Lam Majaw sha N rai

The Kachin Post

September 01, 2002— Shata masum daram na ai Thai the Myen ni ga jarit hta mang-hkang byin na gap hkat ai majaw ya ten du hkra ga jarit chyinghka hpaw ai lam n nga ai gaw mungdan lahkawng matu gruau n'na mungdan lahkawng nga mungchying sha ni hpe hpaga lam hta yak hkak ai lam ni law htam wa shangun nga ai.

Ga jarit pat da ai majaw Thai hpaga la ni hku na Thai gumhpraw Wan tsa hte shadang na sum nga ai hte maren Myen mung de mung Thai gung rai law malawng hpe n lang na matu tara jahkrat wa ai majaw Myen mung masha ni mung lu sha hte kaga rai ni sha n ga Thai mung kaw na matut la nga ai myihprap wan mung di kau ai majaw June shata hkan gaw ga jarit mare ni rai nga ai Myawaddy hte Tachilake ni gaw n'sin kata hta rai mat ai.

Hpang jahtum Thai maigan hkringmang Surakiat August shata praw hta Myen hte ganawn mazum lam kaja wa na matu Myen mung de sa du na ai hpang gajarit manghkang ngut mat na zawn rai wa tim Myen hpyen du ni hku na Thai kaw nga n'na shanhte hpe ning-hkap nga ai Myen ninghkap hpung ni hpe Thai ni hku na n hkap la wa na matu shadut ai lam hte seng na manghkang naw nga ai rai nga ai.

Ganing hku mi rai rai, Thai ni hku na Myen mung hte matut mahkai lam kaja mayu ai madung gaw shanhte a hpaga lam grau na amyat lu wa na matu gaw madung nan rai nga ai. Thai gung rai ni Myen mung de n shalai lu ai majaw shani shagu Thai gumhpraw wan lam sum nga ai sha n ga kaga Myen hpyen du ni hte jahkrup na galaw da ai hpaga lam ni law law mung dai mang hkang ni a majaw bungli n byin na hpe gaw Thai ni hku na n byin shangun mayu ai rai nga ai.

Thai gaw Myen mung na hpaga ni hta a'rang gumhpraw dollar Wan tsa lam bang na akyu amyat law law hpe lu nga ai sha n ga grau na akyu amyat lu mai ai hpaga lam ni hpe galaw mayu wa ai rai nga ai. Dai lam ni hta madang tsaw ai matut mahkai hpungtang hpaji hte seng ai hpaga lam ni kaw na Jinghpaw mung Puta O mare makau kaw Ski dabang hpaw na hte seng na mung myit shang sha nga ai rai nga ai.

Jinghpaw mungdaw gaw Sinpraw dingda Asia dan kaw Hkyen nga ai sha langai sha re ai re majaw dai shara kaw Ski dabang hpaw na lam hpe Thai Hkringmang daju Taksin wa gaw grai myi shang sha ai rai nga ai. Ski dabang hta arang bang na gaw gap na matu Myen hpyen du ni hte laiwa sai March shata kaw na jahkrup wa sai raitim n'dai kalang Surakiat Myen mung sa ai shaloi mung Thaksin hku na dai lam hte seng na jahkrup wa na matu matsun dat ai rai nga ai.

Thai ni hku na anhte buga Jinghpaw mungdaw de hpaga lam a matu myit shang sha wa ai re majaw laiwa sai March shata hta KIO du n'kau mi hpe Thai mungdan de sa du hkawm chyai na matu ahkang jaw sai rai nga ai. Dai sha n ga Thai mung nga Jinhpaw Wunpawng myusha ni hpe mung Thai mung nga kaga myusha ni zawn tara shang masat ding sat jaw wa ai lam ni hpe mung mu lu saga ai.

August shata praw hta Chiang Mai mare kaw galaw ai Thai Bu hkawm magam dap na woi awn galaw ai maigan bu hkawm magam shatsam poi hta ka manawt na matu mung saw shaga hkrum sai rai nga ai. Dai hta Thai mung na langai sha nga ai Ban Mai Jinghpaw mare masha ni shang lawm sai rai nga sai. De hpang nau n na yang dai mare hta anhte myusha ni a masat dingsat Manau shadung hte htung hking n'ta ni hpe Thai Asuya hku na gaw gap na matu ahkang jaw wa ai rai nga ai.

Jinghpaw Wunpawng myusha ni hpe ya dai ni she Thai ni hku na shanhte mung dan hta madang langai mi hku na masat dingsat jaw wa ai lam gaw anhte myusha ni matu hpa mi rai rai kaja ai maga de rai wa nga ai ngu tsun mai ga ai sha n'ga Thai myusha ni hpe mung anthe Jinghpw Wunpawng myusha ni manu shadan ai hte yawng a masat dingsat Manau shadung hpe shanhte buga hta gaw shachyaw na a'hkaw a'hkang jaw ai majaw Thai myushan ni hpe anhte a jinghku kaja langai hku na masat dingsat jaw ra sai rai nga saga ai.