Karai Hpyi Raw Kau U

The Kachin Post

May 01, 2002— Muse ginwang Mungmau mare kaw 34 lang na KBC mung shawa zuphpawng hpe Myen hpyen du Mawng Aye hku na April shata praw hta pat kau ya ai lam gaw Jinghpaw Wunpawng Hkalup hpung hte dai Hka lup hpung masha ni hpe n-gawn n-sawn di dat ai lam she re ai ngu na mu mada ga ai. KBC mung shawa zuphpawng gaw lai wa sai shaning 100 ning daram kaw na masum ning kalang galaw wa ai Makam masham lam sha n'ga myusha lam aq matu grai ahkyak ai shawa hpawng langai rai nga ga ai.

Masum ning kalang galaw ai KBC mung shawa hpawng hta lata la hkrum ai Hpung Salang ni gaw Myusha yawng ngu na daram hpe makam masham lam hta sha n'ga, Mung masa lam hte lam amyu myu hku n'na woi awn lu ai Ahkaw ahkang lu ai ni rai nga ai. Mung chying sha ni mung dai shawa hpawng kaw lata la hkrum ai Hpung salang ni hpe gaw tinang aq ningbaw ningla langai hku kam hpa let shanhte lam woi ai hku hkan sa ma ai gaw anhte Jinghpaw Wunpawng myusha ni aq zai ladat nan rai ga ai.

Dai ning na KBC shawa hpawng pat kau hkrum ai gaw lai wa sai aten hta pat kau hkrum ai ni hte lak lai na n'htan shai nga ai. 1965 ning na Lashio hte 1975 ning na Putao zuphpawng ni pat kau hkrum ai aten hta gaw lam amyu myu aq majaw raitim ya dai ni Myen ni hte sim sa lam la da ai aten hta ndai zawn rai shawa hpawng galaw na ahkang dawm kau ya ai gaw grai myit yu na lam ni lawm nga ai hpe mungchying sha ni yawng dum hprang ra saga ai.

Yahte na shawa hpawng hpe Myen hpyen du Hkin Nyunt hte Sam mung dingdung Hpyen du ni hku na galaw na ahkang jaw da sai hpe Myen hpyen du Mawng Aye hku na pat shingdang kau ai hpe yu yang Myen hpyen du lahkawng tingnyang shara kashun hkat ai lam re ngu ai hpe gaw asan sha mu na ga ai. Raitim Myen hpyen du ni ndai zawn rai ai ladat ni lang na shanhte aq akyu aq matu galaw mat wa ai lam ni law law nga ai hpe mung n-mai malap kau ga ai.

Jinghpaw laika lu ai 100 ning poi na Manau shadung hpe Myen hpyen du Maung Aye ndai zawn rai ladat ni lang na baw kau ya ai gaw shanhte hku na n-kam galaw shangun ai poi hpe grai tsawm ai ladat ni hte hpang jahtum jahten kau dat ai rai nga ai. Ding rai ai ladat ni hpe yu yang n'tsa lam hku gaw Hpyen du lahkawng n-rum hkat ai zawn shadu la mai ai raitim kata lam hku gaw shan lahkawng aq rasharawng ai lam ni bung nga ai rai n’na shanhte aq akyu amyat lu na matu hte hpawn kalang ta galaw mat wa ai lam ni nan rai nga ai.

Myen hpyen du ni hku na zai ladat amyu myu hte ginsup shingdang nga ai hta grau n'na anhte Jinghpaw Wunpawng Hkalup Hpung shawang kata hta mung ningbaw shara kashun hkat ai lam ni nga ai hpe gaw yawng chye na re. Dai hku byin taw ai majaw hpung magam gun shada lapran hta mung shi na masha, nye na masha nga na garan ginhka ai lam ni law law rai nga ga ai.

Sara Saboi Jum hta mung ndai kalang na shawa hpawng hte seng na grai lit nga ai ngu tsun mayu ga ai. Shi gaw KBC nignbaw langai hku na KIO hte Myen hpyen dap ni gap hkat jahkring na matu matut mahkai ya lai wa sai rai nga ai. Dai re majaw shi gaw Myen hpyen du Hkin Nyunt hte grai hku ai ni rai nga ai.

Raitim hpa majaw ndai mung shawa hpawng n-lu galaw ai lam gaw Sara Saboi Jum aq akyu amyat lawm na re ngu shadu la ga ai. Sara Saboi Jum gaw lai wa sai 3 ning kaw na shi aq magam ladaw htum sai raitim Amumadu magam kaw na Tingnyang Up magam de htawt sit na magam bai matut ai rai nga ai.

Ya ndai lang na mungshawa hpawng hta mung shi na magam shara naw matut lu na n-lu na gaw Mung shawa ni aq lata hta rai wa ai re majaw, matut magam gun lu na matu dingkeng ai ladat hku shakut ai lam mung mai byin na re ngu shadu ga ai. Hpa mi rai rai ya na mung-shawa hpawng htawt sit kau sai re majaw Sara Saboi Jum gaw laning mi jat na shi aq magam shara hpe naw lu tek jum tawn na rai nga ai.

Lahta na lam ni hpe maram yu yang anhte Jinghpaw Wunpawng sha ni yawng chye ra sai gaw Karai magam gun n'kau mi gaw Hpung lam hpe gabye n'gun la n'na mung masa lam hta shara shang la wa nga sai hpe dum hprang ra saga ai. Dai lachyum gaw hpung sara ni mungmasa n-mai shang lawm ai ngu tsun mayu ai n-rai. Hpung magam hpe tinang aq dingkyeng akyu matu galaw ai rai yang gaw 'Karai hpyi' raw kau ya rit ngu na tsun mayu ga ai. Raitim hpung sara ni hpe mung ndai zawn rai myusha yawng grai yak hkak nga ai aten hta Mung chying sha ni aq ra sharawng ai lam ni hpe Karai Kasang aq tsaw ra myit hte ta tut jahpring jatsup ya ra sai ngu shadut dat n'ngai.