Ahkaw Ahkang Lu ai Myusha Tai Ga

The Kachin Post

March 01, 2002— 1961 ning kaw na hpang wa ai Anhte Jinghaw Wunpawng myusha ni aq rawt malan gaw myusha yawng aq madi shadaw hkap la ai majaw shaning 30 ning jan ting mayak mahkak lam amyu amyu hpe myutsaw mungtsaw ai myit ni hta maju jung let shakut shaja sa wa ai raitim yawng yaw shada ai awm dawm hpe gaw lu la na matu gaw ya ten du hkra nmai byin shi ai ngu hpe mu lu ga ai.

Anhte Jinghpaw wunpawng myusha labau hta ndai zawn rai ai masha myusha npu na lawt lu na matu nga n'na galaw ai rawtmalan ngu ai gaw lai wa sai jaw prat hta she byin pru wa ai rai na re ngu ai hpe hkap la lu ga ai. Lai wa sai aten hta na byin pru lai wa ai rawt malan amyu amyu nga lai wa sai raitim dai ni yawng ngu na daram gaw tinang myusha kata hta sha byin ai Gumrawng Gumsa Rawtmalan zawn re ai Rawtmalan ni hpe sha mu lu ga ai.

Dai re ai majaw dai ni na byin nga ai shingra maka ni hta lakap n'na bai sumru yu dat yang myusha langai ngu na mungkan n'tsa hta byin pru wa lu na matu gaw dai myusha ni aq raq sharawng ai, ahkayk ai lam ni aq matu Rawtmalan ngu ai gaw n-nga n-nmai re ai grai ahkyak ai masing masa ladat langai nan rai nga ai. Dai hku rawtmalan ni hpe tawt lai wa ai shaloi dai rawtmalan hte ging dan ai arang hpe jaw ra ai gaw mungkan aq ningpawt ninghpang shingra tara nan rai nga ai hpe gaw kadai mung koi yen kau nmai nga ga ai.

Ding rai jaw kau ra ai arang ni hpe Rawtmalan galaw sa wa ai shaloi tinang myusha aq ngun hte madang amyu myu ntsa hkan na jaw kau ra na arang kade kaba nkaba na hpe maram shagreng ra ai gaw dai myusha ni hte ningbaw ni aq lit kaba rai nga ga ai. Hpa majaw nga yang Rawtmalan ngu ai gaw kade naq na hte galoi aten hta kade madang hku awng dang na hpe gaw gadai mung lu tak lu tsun ai n-re nga ai majaw re.

Raitimung dai lam hta galaw shakut shaja wa sai nga ai kaw na gaw gara ten hta hpa galaw na, kade daram galaw na hte gara grau ahkyak ai hpe gara hku awng dang hkra kade daram galaw na ngu ai masing lamang ni hpe tau hkrau na jahkrat da ra ai sha n’ga, nga nan nga ra ai lam ni rai nga ai.

Dai ni aten na Anhte Jinghpaw Wunpawng myusha ni aq Rawtmalan labau hpe yu ga nga yang ndai gaw anhte myusha ni aq shawng n’nan ngu ai grai ahkyak ai rawtmalan ngu ai hpe mu lu ai zawn anhte myusha mungkan n'tsa hta masha myusha ni hte rau sinda shingdaw let lu tsap nga lu na matu grai ra ahkyak ai mahkrum madup hpe la taw nga ai hpe mu lu ga ai. Dai zawn rai tawt lai wa ai shaloi tinang myusha hte htap htuk gingdan ai ladat ni jai lang wa ai hte maren myusha ni aq matu akyu yawm shangun ai hkrat sum shangun ai ladat ni hpe mung jai lang wa sai hpe mu lu ga ai.

Ya ten hta na anhte myusha yawng hte seng ai rawtmalan hpe yu dat yang Myen hpyen uphkang ai ni hte gap hkat jahkring (Cease-fire) galaw da ai 9 ning du hpring wa sai aten hta myusha yawng aq akyu ara (National Interest) hpe gade madang daram du hkra jahpring jatsup lu sai kun ngu ai hpe shawng myit yu ra nga ga ai. Dai gap hkat jakring ai aten hta shang lawm mgam gun hpai wa ai du salang ni mung dai lam hpe gaw malap kau na n-re ngu ai hpe kam lu ga ai. Raitim gap hkat jahkring ai hpe n’ra sharawng, n’hkap la ai ni mung anhte myusha hta law law nga ai hpe mung hkap la ra nga ai.

Gap Hkat jahkring (Cease-fire) galaw ai majaw mung chying sha ni hkala n’ba n-hkrum sha ai hte maren ngwi ngwi pyaw pyaw rai tinang aq jinghku jingyu ni hte lu hkrum zup lu ai lam ni gaw gap hkat jahkring ai aq kaja ai maga na lam ni nga ai zawn anhte aq mung daw mung dan kata hta n’hprang rai ni ma wa ai lam, maigan masha jahpan law htam wa ai lam Myen hpye dap ni aq laja lana uphkang ai lam ni grau yawm wa ai lam n-nga ai hpe gaw ntsa lam hku na mu hkrum sha nga ga ai rai nga ai.

Ngut na myusha ni aq Mung masa lam, Hpaga lam, Hpaji hkaja ai lam, Htung hking hte laili laika lam ni hte lam amyu myu hta yawng rasharawng ai hku rawt jat wa ai hpe n-mu lu ga ai gaw teng teng sha rai nga ai.

Grau na myit yu ra ai gaw Anhte myusha ni aq Ahkaw Ahkang hte seng na rai nga ai. Dai hte seng na ya dai ni anhte myusha ni tinang aq dai daw Buga kata hta uphkang na Ahkaw Ahkang pi rai n-lu shi ai rai nga ai. Dai hta n’ga anhte myusha ni aq Ahkaw Ahkang madang gaw gade daram sha nga wa ai hpe gaw mu chye ai ni gaw mu lus na masai ngu kam ai.

Maning na December shata hte dai ning na January shata hta grai awng dang ai hku galaw lai wa sai Wunpawng Ninggawn Hkumra Manau poi hpe yu yang mu lu na rai nga ai. Dai poi gaw mungkan hta kaba htum ai manau wang kaw Jinghpaw Wunpawng myusha ni hkum hkum zup zup rai galaw lu wa sai ngu na arawng la mai ai raitim dai poi galaw ai aq majaw myusha yawng aq matu grau n'na mungmasa lam hta gade daram akyu amyat lu ai lam hpe myit nan myit yu ra ai nga ai. Dai poi kaba hta Shanglawt hpyen la, hpyen num ni shanglawt hking hpun let kamanawt lai wa ai gaw jahkring mi na laman myusha yawng hpe myit rawt shangun ai raitim maga mi na hku yu yang Hking (Uniform) hpun na Ahkaw Ahkang sha naw lu ai ngu ai hpe mu lu ga ai.

Ngut na ya hte sha Jinghpaw mungmasa mungkan hta gabrawng pru wa ai Cease-fire Monitoring Committee hpaw hpang wa na matu seng arng ai ni hpe shadut ra ai nga na shi ga hpe maram yu yang dai gaw grai ra ahkyak ai lam re ngu mu lu ai raitim dai lam byin pru wa lu na matu gaw loi loi hte n-mai byin na hpe mu lu ga ai.

Hpa majaw nga yang ya Mungkan ting hta byin nga mung masa mang hkang ni hpe bai yu dat yu yang anhte aq mayak mahkak gaw hpa nre mat nga ai sha nga Maigan mung dan ni mung shanhte aq akyu amyat n-nga ai sha chyeju hte sa na garum ya na ngu ai gaw gara hku n-mai byin ai majaw rai nga ai. Dai majaw tinang aq manghkang hpe tinang nan gara hku lu puran na hpe shawng galaw ra rai n’na n-mai byin yang she maigan de na garum shingtau shang lawm na matu hpyi shawn ra na re ngu shadu ai.

Lai wa sai aten hta ganing mi rai rai ya dai ni ndai aten hta gaw myutsaw ai nga ai anhte ni yawng du na ra ai prat hta anhte myusha ni ngang ngang kang kang rai Mungkan lapran hta ashing kang mi rai na masha myusha npu n-re ai sha lu tsap nga na matu gaw anhte myusha ni yawng ngang kang ai myit jasat ni hte nang ngai kaji kaba n-ginghka ai sha ta gindun let myusha yawng aq ra ahkyak ai hta grau ra ahkyak nga ai Ahkaw Ahkang lu la na hte Ahkaw Ahkang lu ai myusha byin tai lu na matu shakut shaja sa wa ga ngu na shadut dat n’ngai law.