Shawa Matut Mahkai Magam (Media) Rawt Jat ra Sai

The Kachin Post

July 01, 2002— Kachin Post shi laika shapraw ai hpang nau n na ai aten ladaw hta Jinghpaw Wunpawng myusha yawng n raitim, Thai mungdan Chiang Mai mare kaw na shiga hpe myit lawm ai ni dai ning na May shata hta anhte myusha ni aq Shawa matut mahkai lam (Media) hta rawt jat wa lu na matu jahkrup shaga ai lam gaw myusha yawng galu kaba ganga wa na matu lam hpaw ya dat ai hte bung nga ai.

Buga shinggan de nga ai anhte myusha ni hku na gaw, mungkan ting hte kalangta lu matut mahkai ai E-mail, Internet zawn rai ai ni hpe lu jai lang ai re majaw, mungkan ting na shiga ni hpe n hkring n sa ai sha, chye lu nga ai. Shiga hte Shawa matut mahkai lam ni hte seng na gaw, ya ten hta maigan de nga ai anhte myusha ni matu jasam n rai sai raitim, buga de nga ai ni matu gaw ningnan zawn naw rai nga ga ai.

Raitim maigan de nga ai anhte myusha ni law malawng gaw tinang aq buga de hpa baw byin nga ai lam ni hpe grau chye mayu ai rai nga ai. Raitim tinang buga hta byin nga ai mabyin masa shiga ni hte seng na htawn shana ya lu ai Shawa matut mahkai lam hpe lit la na galaw nga ai ni gaw grai naw n law nga ai hpe mu lu ga ai. Dai hta grau n'na dai shiga ka ai, shana shabra ai lam ni hte seng na myit lawm let aja awa galaw na ni mung grai ra kadawn nga ga ai.

Grau n'na buga de nga ai anhte myusha ni matu shiga shabra ya na matu gaw yak hkak ai raitim shanhte gaw shiga lu la lam hta grai ningra nga ai, grai hpang gara nga ai ni re majaw mungkan hta byin nga ai lam ni hpe chye lu hkra lam amyu myu hku shana shabra hpe madung dat na galaw na gaw grai ahkyak nga ga ai.

Jinghpaw mung kata hta gaw dai lam ni galaw na matu nachying nan n mai byin ai re majaw maigan de nga ai myusha ni hku na Shiga magam hte seng na bawng-ring wa na matu galaw ra ai hpe mu lu ga ai. Anhte(Kachin Post) hku na mung Myusha yawng hpe tengman akyu rawng ai shiga shana shabra ya na magam bungli hpe gaw shangai wa ai kaw na lawm wa ai sali wunli langai re ngu hkap la ga ai.

Ya ten hta maigan nga Jinghpaw Wunpawng myusha shingwang kata hta shiga magam hte seng na galaw wa ai ni nga ma ai, raitim shiga ni hpe ka ai shaloi lit la ai lam n nga ai sha, tinang aq ningmu ni hpe ka bang nga ai hpe mu lu ga ai. Grau na n teng ai shiga ni hpe mung gwi gwi ka nga ai hpe chye lu ga ai. E-mail hte Internet ni hpe grai dam lada ai hku lu lang wa ai re majaw, tinang ka mayu ai hpe kam ai hku ka shabra hkat ai lam gaw ya ten hta shada da chye na hkat lu ai raitim, n chye na hkat ai shani gaw manghkang kaba rai wa na hpe gaw sadi ra ga ai.

Shiga hte seng na n'htan shai hkat ai majaw shiga hti shawa ni hpe myit ung ang shangun ai sha n-ga, n hkungga ai hte bung nga ai. Grau na tsang ra ai gaw dai zawn rai hti shawa ni hpe n gawn n sawn di ai majaw byin pru wa na manghkang ni hpe myusha yawng hkam sha ra na gaw teng teng sha rai nga ai.

Galu kaba ai mungdan langai byin pru wa na matu gaw Demokrasi tara nga ra ai zawn mungchying sha yawng hta mung tinang tsun shaga, ka mayu ai lam ni hpe asan sha dan dan leng leng tsun ka lu ai gaw grai ahkyak ai ahkaw ahkang langai rai nga ai. Dai zawn rai ai lam ni byin pru wa na matu lapran matut mahkai ya ai Shi laika, Nsen shapoi dap, Hkrang mu sen na dap hte Radio shiga dap ni gaw n nga n mai ai hkrang ni rai nga ai.

Mungchying sha ni mi hpaw wa na matu, hpaji jaw ai lam hta shiga shabra ai lam gaw grai ahkyak ai re majaw shiga ka ai, shabra ai wa hta grai lit nga ai re. Mungchying sha ni aq akyu ara hpe hkra wa ai n teng ai shiga ka ai wa hpe mung tara je yang mai ga ai. Dai zawng rai ai shiga ka ai ni hte hti shawa ni lapran mang hkang ni n byin wa na matu lit la na hparan ya lu ai Shi laika magam gun uhpung uhpawng langai hpe gaw jawm bawngban na gaw de ra sai rai nga ga ai.