Kabu N’gun Lu Let Yawn

Nga Rem Brang

Wunpawng Shadang nye a sindai kraw kata hta tang mi adu, n’gun mi alu,
Kraw dung salum hta ndung npawt asan brang ngu,
Ga ngau shagu hpe lachyum mi apru, madai myit mi amu rai,
Simsa katsi pyaw ai Wunli Ninghkaw Jan hpe hkap tau la let
N rau tim rau hkra, nkam tim kam hkra,
Mali Ahka hpe da sang jahtuk la n’na,
Jinghpaw Wunpawng amyu lai hte htap htuk hkra sumli,
Tinang amyu a manawt dingsawt hte pre ai maka hte shala n’na,
Mungkan ting de lam amyu myu a majaw chyam bra hkawm shajang nga ga ai
Anhte myusha shagu a matu tang madun dat ai.

N’dai zawn htap htuk manu dik sai Wunpawng Shiga Pinra rai nga ai
www.kachinpost.com, www.kachinnews.com, www.kachinnet.com ni hte
Kaga n’dai zawn re ai Ganghkau hkriran ni hta na
Ngai hpe shaprat dat ai Wunpawng Buga hte seng ai
Shiga ningnan ni hpe ala hti chyai let,
Nye a lani mi a manap ten shagu hpe hpang ai akyang langai she rai mat hkra
Grai kabu awng sharawng ai hte n-gup hte sha gaw pi n chye tsun na daram
kabu n’gun lu n’ngai re.

Kabu ai ngu nga yang she mau hpa,
Masha shagu ngu na daram daini na mungkan a mau hpa,
Mau hpa mabyin ni gu-dek hpe mu mau, na mau n ma rai nga a hka!
Dai sha kanang rai na,
Machyawng na pa hte sha na yu n’na mau n ma nga yang
Du hkawm n’na mu la hkawm mat wa ai ni she len nan mat na daram rai mat ang sai.

Manu mana yu tsawm, htap htuk ai
Jinghpaw Wunpawng amyu ni a Htunghking sumlu ai maka kumla hte
Shapre n’na atsam, ladat shaw sama da ai Htung Hking Banner ni hte
Rawt jat galaishai lam hte seng ai shiga ni hpe lu mu hti n’na,
Daidaw lahpyen shingnip Wunpawng Buga kaw n’na sumtsan dinghta jut mi kaw
Du taw nga ai Nga Rem Brang n kabu ai sha n nga ngut n’ngai.

Dai hte maren, Buga na manu dan ai n’hprang sut rai ni lani hte lani,
Shi hte shi, n dum shami mat ma wa ai ginlut htingnut shiga ni hte
N’dau shabra laika hpe bai mu hti la ai shaloi

Lani hte lani, ban hte ban
Mungkan hpaji ni hpe hkum dingdek tinang hte ang seng ai made
Awngdang chyechyang la nga sai shiga ni hpe lu chye la n’na
Grai n’gun lu dum taw nga ten,
N’de nhpu wa mi tsamri sha myihpaw wa saga ai ngu kabu shakawn dinglai taw nga yang,
Chye dinglai dum mat n’na,
Tinang a chyinghkai kanu mungdan hte amyu sha ting hpe
Ga kapaw garan ayai dumbru dumbra rai mat wa na maga de woi lam dam
Numshe de hkye la she n mai mat hkra shanang, Na-yawng yawng taw nga ai
Chye dinglai mat ai prat dep Wunpawng Ramma ni
Lam hpe soi sam soisam bat manam na ai n’na tarung ru mat wa wa re ai shaloi

Htung hking hte Makam Masham lam hta sung hprang wa saga ai majaw,
Madangtsaw ai Karai masa, Chyum hpaji ni hpe lu chye sharin hkaja la lu saga ai ngu
Kabu shakawn n ma rai nga yang,

Tinang manang madu chye ai hku na,
Madu hpe shingma ningntsa ba maka ai Kajidwi dingla hpe myipai mu n’na,
Yungnu dip maka hte sha laika ka ai
Chyinghkai Kanu ni hpe madoichyu n yip mu mat wa ai lai masa lang n’htawm,
Hkum dingdek mare na hpung masha htinggaw jahpan hta htihkum grau law hkra
Nawku Hpung/Jawng Fund jat shalaw la chye wa ai
Ninghkring…. Ninghkring ni a hpang hkan nang na matu myitru jamjau let
Daw dan yak jawng taw nga ai kamsham ai mara kata
Hpung masha ni a madai n’sen ni hpe na lu ai shaloi,

Nga Rem Brang gara hku hkam sha nga na re ngu,
tsawra ai shiga hti shawa masha ni maram la na kun?
Kadai mung n mu ai sha, tsun dan na pi gaya dik let,
Du krung sha ngu, myitru
Manu mana yawn tarung ru mat n’ngai.

(August 29, 2004)

Lahta na ga shagawp gaw Nga Rem Brang a myit mang ai lam ni sha rai n’na, The Kachin Post a ningmu ni n re ai lam chye shangun mayu ga ai.