Mau Hpa
May 2, 2005

JJ Lum Dau

Tinang a buga de na shiga lam madat yu yang shada shakawn hkat ai chyu na lu ai zawn, Myenmung lam, maigan lam hte seng ai shiga ni mung shada shakawn hkat ai hpe chyu na wa sai. Raitim, ya hte na lu ai Tony a shiga chyawm gaw loi mi laklai ai majaw myit su manang ni mung na lawm na matu lawu na hte maren shana dat ai hku rai li ai.

Tony gaw bungli hkan tam nga yang New York na American company kaw amu lu wa ai da. Shi a lauban wa gaw American Jew re majaw aten n tam ai bungli chyu woi bawng ai da. Kade n’na yang myit htum n’na pru mat sai. Dai hpang Germany kaw bungli ningnan wa shang yang shi a lauban gaw German Jew num re da. Shana yuptung lai wa timung shi a yup gawk kaw ahkyak ai bungli ni naw shangun nga ai majaw grai shari dum let, shi a sahti jan hpe hprawng shakram kau da sai da. Dai hpang Bangkok de du n’na coffee seng kaw sa dung nga yang, dai kaw bungli galaw ai num sha gaw Tony hpe hpa baw ra n’ni? nga n’na san ai shaloi, “Nanhte a mungdan kaw Thai Jews i nga a ni” nga n’na htang san wa ai da. Sorry, Thai Juice n nga ai. Raitim, hkamja lam a matu grai kaja ai Orange Juice gaw nga ai” nga n’na tsun dan wu ai da. Dai hpang kade n’na yang shan gaw myi sai yu htuk hkat ai majaw dinghku de masai.

Lani mi hta Tony maw daw gau nga yang, lam makau kaw tsap nga ai num sha langai shi hpe mani sum rai galaw dan ai majaw maw daw hpe kalang ta jahkring da n’na, “Nang hpe hpa baw garum la ra na kun” nga n’na sa san ai da. “Waw ra kaw du jang ngai hpe garum la mai na re” nga n’na tsun let lam makau na hotel kaji de ta ladawn dat ai da. Tony gaw shi a n-gun atsam ma hkra hte garum la na matu gat lawk rai sai nga n’na myit la let, lawng ta she shalun la hkra rai n’na hkan nang nu ai. Dai num sha gaw hotel makau kaw naw du yang, ngai hpe garum la na shara du sai nga n’na tsun let labu she htinglun wa magang sai da. Hpa majaw nga yang shi a maw daw gaw hkumpup lam kaw jak hkring mat ai majaw re hka! Num sha gaw maw daw kata de shang dung n’na Tony hpe shingdu hku aja wa ganawng shangun sai da. Tony gaw n-gun grai ja ai wa ngan rai nga ai. Shan gaw aten hpe jahkrup la n’na Tony gaw ONE, TWO, THREE nga hti let n-gun ma hkra hte ganawng dat yang maw daw gaw, boo… nga ai nsen hte gumhtawn pru mat wa ai hpe grai tsan hkra hkan yu dat nu ai. Dai shaloi she, “River of No Return” rai sai lam dum la nu ai. Shi a hkum hpe bai yu dat yang, maw daw ahpre bun kau da ai hkumpup gaw shi a myi man hte hkum ting kaw maza mat sai da. N’ta bai du ai shaloi shi a madu jan gaw grai pawt ai hte hpa baw byin ai lam hkap san ai da. Hotel makau kaw num sha langai gaw shi hpe gawai ai ladat hte dam ari jaw kau da ai lam tsun dan ai da. Shi a madu jan gaw grai na pawt n’na, “Hpa majaw dai num sha hpe dingtawk ladat hku n’na hotel kata kaw dam ari njaw kau da n’ni” nga n’na kajet kau katut ai da.

Tony gaw yak nga ai masha ni hpe alu hkan jaw ai Foundation langai kaw bungli lu wa ai da. Lani mi hta shi a lauban wa gaw, matsan ma ni hpe jaw na matu gumhpraw wan langai hte gumgai dingla ni hpe jaw na matu wan langai, yawng wan lahkawng alu sa jaw na matu lit shatsam dat ai da. Dai alu gumhpraw gaw gara kaw sa jaw yang htap htuk na kun! nga n’na mali ya tup myit yu ai shaloi, shi naw kaji nga yang grai matsan wa sai hpe myit dum dat ai majaw, wan langai gaw hkra sumbu kaw bang dat sai da. Atsawm bai matut myit yu ai shaloi shi a kaji dwi gaw ram ram dingla wa sai hpe myit dum dat ai majaw naw ngam nga ai wan langai hpe pai maga na sumbu kaw hkrak sha alu bang dat sai da. Kasi la ging ai ladat ni she rai nga ai

Tony gaw Jimmy hte Tino ngu ai kasha lahkawng lu wa sai. Lani mi hta Jimmy a Sara gaw atsuya a lam tsun dan ai raitim nchye na ai majaw atsuya ngu ai gaw hpa baw rai ta? nga n’na Tony hpe wa san wu ai. Ga shadawn, asuya ngu ai gaw anhte a dinghku hte bung ai. Ngai gaw President, na nu gaw Congress, shangun ma gaw bungli galaw ai masha, nang gaw mungmasha, Tino ma chyangai gaw, shawng lam a matu rai nga ai, nga n’na tsun dan ai. Raitim, Jimmy gaw shi a kawa tsun ai hpe asan sha rai n chye na wu ai.

Dai shana yuptung ten kaw Tino hkrap marawn nga ai hpe Jimmy rawt yu dat yang, Tino gaw shi a myiman hte hkum ting kaw hkyi kaman rai mat ai hpe mu ai majaw shi a kanu yan kawa a gawk de gagat shang wa yu yang shi a kawa hpe n mu wu ai. Shi a kanu hkrai sha grai ja ai yup gawk n’sen hte yup pyaw nga ai hpe mu kau da nu ai. Dai majaw shangun ma a gawk de bai gagat shang wa yu yang, shi a kawa gaw salat she hprwi rai shangun ma hte boxing htwi hkat nga ai hpe asan sha mu n’na grai mau mat nu ai. Dai shaloi Jimmy gaw, “Oh!... atsuya ngu ai lachyum hpe ya she asan sha chye sai. President wa gaw bungli galaw ai ni hpe boxing htwi, Congress a lit gaw yup gawk chyu gawk garu, mungmasha hpe gaw kadai mung ahkyak n la ya, shawng lam ngu ai gaw hkyi kaman she rai mat sai, nga n’na marawn tsun dat ai shaloi she shi a kanu gaw tsam mari rai hprang kajawng wa sai da.

Dai shaloi Tony gaw grai kajawng kahpra ai hte wa hkawm shakut hkawm pru wa let, Jimmy hpe abawk nu ai. Wa a tsaw ra la ai Jimmy e, wa tsun ai hpe atsawm madat ya rit yaw. Wa n’dai gawk de sa ai lam ningnu hpe tsep kawp hkum tsun dan yaw. Wa gaw Jimmy hpe muk jahpu htam lahkawng masum du hkra jat jaw na re yaw, nga n’na naw abawk nga yang, shi kanu gaw ndi nda rai yup gawk kaw n’na kagat pru wa let, “Jimmy e, na a shawng lam gaw grai myit mada shara kaba ai re. Nang hpa baw ra timung lu wa hkra ningwa gaw shi a atsam htum hte shakut ya nga ai. Yu u le, na wa gaw yuptung lai wa nga timung, an nu ni a matu bungli kade naw shakut nga ai. Salat she pya rai bungli nau ba mat n’na lam pyi nlu hkawm mat sai majaw wa hkawm she hkawm mat nu ai. Oh! na wa hpe grai matsan dum la ai. Dai majaw nu gaw ningwa hpe grai kam hpa tsaw ra ai she rai yang. Jimmy mung ningwa gaw an nu ni a matu kade shakut ai hpe mu chye ya ra na re yaw, nga n’na na chying tsaw ra lanu lahku ai nsen hte tsun ai majaw Jimmy mung chye na ya sai lam hkam la nu ai da.

Lani mi hta Tony gaw shi grai ra sharawng ai gupchyawp shamat sha kau ai da. Dai zawn re ai gupchyawp hpe gat kaw sa tam yu timmung n mu mari sai majaw, laban shani nawku jawng de sa n’na masha ni sa tawn da ai gupchyawp ni hpe sa azi yu nga nu ai. Gam mi akaja rai shi a gupchyawp hte bung ai gupchyawp langai hpe mu dat nu ai. Akyu hpyi nga ai ten hta yat sha la mat wa na matu myit nga yang tara hkaw sara wa akyu gaw lawan n woi hpyi, tara kanu (10) a lam nambat langai a hpang langai azin ayang hkaw tsun galu nga sai da law. Dai hpang Masha num hkum shaw ngu ai nambat kaw hkaw tsun dat ai hte shi a gupchyawp gara kaw malap kau da ai hpe kalang ta myit dum dat sai da. Dai majaw tara hkaw sara hpe na chying chyeju dum ai lam sa tsun kau da n’na shi a gupchyawp hpe aten dep sa lu tam la na matu nawku jawng wang kaw n’na ndi nda rai kagat pru mat wa nu ai da. Dai shani kaw n’na shata law law lai wa sai raitimung, tara hkaw sara gaw Tony hpa majaw shi hpe chyeju dum ai lam tsun kau da ai hpe n chye na ai majaw dai ni du hkra naw mau nga ai lam na chye lu ai.

JJ Lum Dau gaw Wunpawng Mungdan Shanglawt Hpung, KIO, a Ginjaw Committee malawm langai rai nga ai.