Ginjaw Tsang Nga ai AIDS

La Nan

September 16, 2003—Wunpawng Mungdan Shanglawt hpung gaw simsa lam a matu shakut nga tim n mu lu ai hpyen a majaw tsang ra ai lam ni nga lu ai. Hpyen gaw Myen n rai, n mu lu ai AIDS a’na rai nga ai. KIO ginjaw du ni gaw dai ni na hpyen dap kata hta dai a’na lu ai hpyendu hpyenma ni law htam wa hpe tsang nga ma ai.

Dai ni na ten hta Wunpawng Mungdan kata hta sinat kapaw ai lam zim mat wa magang nna buga ni simsa wa sai. Wunpawng amyu sha a’sak ram ai brang hkawn ram ni gaw, pyaw hpa lam hta len nna AIDS a’na byin hkrum hkra ai madang grai tsaw nga sai. KIO a magma dap shara shagu hta AIDS a’na byin n’na si ma ai dap ma, hpu awn ni grai law wa sai hpe mung KIO shiga lawk hku chye lu ga ai.

“KIO Magam gun kaji ni hta ka-ni hpe lu sha ai ni grai law wa sai, dai ni gaw gumhpraw n lu ai majaw, tsi htu samit langai hpe masha law law jawm lang n’na HIV shachyam shabra shakap nga ma ai” ngu HIV hte seng ai makawp maga hpaji jaw NGO salang langai tsun ai.

Dai ning August shata hta galaw ai12 lang na KIO ginjaw salang komiti zuphpawng gaw lak lai ai zuphpawng rai nga ai. Dai zuphpawng hta AIDS a’na hte seng n’na bawngban ai hta shalawm ai hpe chye lu ai. Ningtsa lam bawngban ai hta, hkungran na ramma num la yawng hpe hkamja lam shawng jep shangun na, a’na kanu n mu ai ni hpe sha hkungran a’hkang jaw na, ndai masing hta makam masham hpung woi ni mung shang lawm na matu shadut ya na lam, tsun jahta shalawm ai hpe KIO salang langai tsun ai.

Raitim, “KIO Hkamja Dap ni hku nna ndai a’na zingli hte seng ai hpe grai dam lada ai hku tsun jahta ai lam, mungshawa ni hpe hpaji jaw ai lam, masing jahkrat sa wa ai hta grai n’gun n lu ai” ngu Thai mung hta n’pawt jung ai AIDS a’na byin masha sawk sagawn NGO hpung langai na salang wa tsun ai.

Lawmalawng ngu na anhte myusha ni gaw hkum shan ganawn mazum ai shaloi lang ai condom hpe atsawm n chey lang shi hpe mu lu ai. NGO ni hku na condom hpe majoi garan ya ma ai raitim dai hpe a’hkyak shatai na lang na hpe n rasharawng ai rai nga ai.

“Anhte hkamja dap ni garan na condom grai lu ai, raitim mungshawa ni n chye na ai, dai hpe grai matsat yuk hpa nga tsun ma ai, dai majaw sa hpyi ai ni hpe sha gara jaw ga ai” nga nna KIO Hkamja Du Kaba langai tsun ai.

“Anhte amyu ni gaw kaning re ai jamjau lam hpe mung hkam jang lu ai raitim, pyaw ai hpe gaw kachyi mi pyi n hkam jang lu ai” ngu KIO ginjaw salang wa tsun ai.

Majan ten hta majan jaubu kaba tai let amyu sha shim lam hpe lit la ya lai wa sai KIO magam gun ni mung majan zim nna, majan ten jamjau ai hpe sharai lu na matu sut masa lam ni hpe shingjawng sa wa ma ai. Majan ten hta majan pa kaw jamjau lam amyu myu hpe gap je lai di woi awn lai wa sai KIA Du Kaba ni gaw pyaw hpa lam hta sum a’grawp nga wa magang sai.

Malawng maga magam gun ni gaw HIV a’na a matu sai jep ai lam n galaw ai majaw, kadai hta HIV positive byin n byin n chye lu ai.

AIDS a’na hte si mat ai hpe jahpan hta kahkyin na matu yak hkak ai lam gaw, si mat sai wa a ngam nga ai nta masha ni hku nna myi man sum na hpe hkrit tsang n’na byin ai a’na hpe makoi magap da ma ai. Dai majaw, AIDS gaw nachying shim zim ai hte grai lawan ai lahkam hte Wunpawng amyu sha ni hpe ka-up mat wa sai.

Wunpawng amyu sha ni yawng a shanglawt lu na matu ningshawng gasat nga ai KIO hpung kata hta ndai zawn rai n’na AIDS a’na grai tsang ra ai madang hku byin nga sai majaw, gara ladat hku ninghkap makawp maga na hte seng n’na, ya ten hta KIO Ginjaw hta lit kaba nan rai nga sai rai nga sai.

Wunpawng amyu sha ni AIDS a’na hte si ru mat ai gaw grai law mat wa ai hte maren ya ten hta mare buga shara shagu hta jahkrai ma kaji ni mung grai law nga wa sai rai nga ai. Dai zawn rai ai anhte myusha ni a gam maka hpe myit yu tsang nga ai KIO ginjaw salang langai gaw “AIDS a’na zingli a majaw, Wunpawng amyu sha ni htum mat na sha rai wa sai.”